Йошкар-Олан эше ик визитный картычкыже лиеш. Тиде – Марий парк. Тудо Тазалык аллей воктене верлана да марий сын дене куандараш тӱҥалеш.
«Мари парк» проект «Оласе йӧнан кумдыкым ыштымаш» федеральный программыш пурталтын да йӱклымаште сеҥен: Йошкар-Олаште илыше-влак кокла гыч тудын верч 4 тӱжем утла еҥ шке йӱкшым пуэн.
Марий парк лийшаш верыш 9 сентябрьыште республик вуйлатышын пашажым жаплан шуктышо Юрий Зайцев миен.
Марий Эл правительстве председательын икымше алмаштышыже Михаил Васютин палемден: Марий парк – регионлан кӱлешан объект. Молан манаш гын тудо чылаштлан национально-ориентированный манме кумдык лиеш. Тушто каныме парк, танцплощадке да шке усталыкым, творчествым ончыкташ да шуараш кумдык-влак верланат.
– Шонымашыже теве могай: тӱҥ аллейыште 16 муниципалитетлан вер ойыралтеш. Тиде кугу площадке-шамыч лийыт. Тушто нуно пайрем-влак годым шкеныштым ончыктен, шкешт дене палдарен кертыт. Кажне район нерген уверым возымо табличке, кундемын картше лийыт. Тыге Марий паркыш толшо еҥ рӱдӧ аллей дене эртышыжла эше республик дене палыме лиеш, – каласен Михаил Васютин.
Ойлымо почеш, кызыт проект паша мучашлалтеш. Умбакыже подрядный организацийым палемдат. Але марте шотлымо почеш, проектын акше 70 млн. наре теҥгешке шуэш. Тудым кок йыжыҥ дене илышыш пуртат. Икымшыж дене келшышын, тушто концертым, кинофильмым ончыкташ сценым, йӧнан теҥгыл-влакым вераҥдат. Тыгак йоча площадкым, беседкым, уна пӧртым ышташ палемдалтеш.
Марий Эл вуйлатышын пашажым жаплан шуктышо республикыште илыше-влаклан тыгай верым почмым кӱлешанлан шотлен. Молан манаш гын тушто еҥ-шамыч вашлийын, мутланен, тӱрлӧ тӱвыра программыш ушнен кертыт да тыге марий калыкын ойыртемалтше йӱлаже аралалт кодеш. Юрий Зайцевын шонымыж почеш, Марий парк Йошкар-Олан веле огыл, уло республикын визитный картычкыже лийын кертеш.
Сандене тудын почылтмыжым ынде моткочак вучаш тӱҥалына.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
