Марий Элым вуйлатышын пашажым жаплан шуктышо Юрий Зайцев Марий целлюлоз-кагаз комбинатын генеральный директоржо Александр Сташкевич дене Волжскын социальный инфраструктуржым вияҥдыме йодышым каҥашен.
Комбинатым вуйлатышын каласкалымыж почеш, Марбум Волжскын социальный илышыштыже чолган участвоватла. Оласе калыклан тӱвыра пӧрт, спорт объект-шамыч, тазалыкым пеҥгыдемдыме комплекс пашам ыштат. 220 утла еҥ спорт секцийлашке коштеш, 230 наре – тӱрлӧ кружокыш.
«Тазалыкым пеҥгыдемдыме комплексыште утларак тӱткышым йоча-шамычын канышыштлан ойырена. Тушто спорт сбор-шамыч эртат. Кеҥежым 200 наре еҥ кана. Поснак у ий каникуллан шукын толыт. Комплексыште каток, искусственный футбол пасу улыт, кызыт йӱштылмӧ бассейным чоҥаш тӱҥалынна», – палдарен А.Сташкевич.
Ю.Зайцев предприятийын производственный, чодыра бирже, шӱм-пу куштырам, тыгак макулатурым переработатлыме цехше ден социальный объектше-влакым ончен, эрыктыме сооруженийыште лийын.
Комбинат идалыкыште 120 тӱжем тонн кагазым, 140 тӱжем тонн картоным, 45 тӱжем тонн целлюлозым, 10 миллион квадрат метр гофрироватлыме картоным, 20 миллион штук кагаз мешакым ямдылен луктын кертеш. Тыште технологический оборудованийым уэмденак шогат, сандене производство кугемын гына толеш.
Марбумкомбинатым вуйлатыше-шамыч социальный политике деч посна экологий дене кылдалтше йодышымат ик эн кӱлешанлан шотлат. Предприятийыште мушкылтыш вӱдым эрыктыме сооруженийым чоҥымо шотышто пеш кугу инвестиций проект илышыш пурталтеш. Тудын акше – 1,4 миллиард утла теҥге.
Ю.Зайцев эрыктыме сооруженийын республиклан кӱлмыжым палемден да ыштыме пашалан тауштен.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
