ВТБ, «Открытие», Промсвязьбанк, Совкомбанк, «Россия», Новикомбанк финанс организаций ден ВЭБ кугыжаныш корпорацийым банк-влак кокласе сообщений-шамычын SWIFT (СВИФТ) тÿнямбал системышт гыч кораҥдыме деч вара россиян-влак счётлаште улшо чыла оксашт деч посна кодын кертыт, сандене средствам, жапым шуйкалыде, «лÿдыкшыдымö счётыш» кусараш кÿлеш манын, аферист-влак адакат «сонарышкышт» лектыныт.
Чынжым гын нимогай «лÿдыкшыдымö счёт» уке. Банкын клиентше мошеньык-шамычлан ÿшана да темлымыштым шукта гын, оксажым преступник-влаклан кусара.
Южгунамже шояклыше-шамыч банк-влакым SWIFT гыч кораҥдымылан кöра банк карт-шамыч пашам ыштымыштым чарнат, да калык оксажым йомдара манын ÿшандарат. Но карт нерген уверым специальный спискыш пурташ гын, тудым огыт блокироватле. Тидымак шотыш налын, аферист-влак картын реквизитшым, тыгак вес могырысо кум цифржым пален налаш тöчат. Секретан уверым рашемдымекышт, мошеньык-шамыч картыште улшо чыла оксам шканышт кусарат.
Чынжым гын клиент-влак россий банклаште улшо чыла счётышт да картышт гыч оксам кеч кызытак налын кертыт. SWIFT системе калыкын вкладше дене нигузеат кылдалтын огыл.
SWIFT – тиде банк-влак коклаште кылым ыштыше финанс менеджер. Российыште тудын аналогшо – финанс увер-влакым кондыштарыше системе – пашам ышта, да россий банк-шамыч тудын дене уже пайдаланат.
Кредит организаций-влакым SWIFT гыч кораҥдат гынат, нунылан тÿнямбал переговорым веле эртараш йöндымырак лиеш, но тиде эл кöргысö операций-влак дене нигузеат кылдалын огыл.
Счётысо але картысе оксан йомын кертмыж шотышто йыҥгыртат але СМС-уверым колтат гын, темлымым шукташ ида вашке, а банкын шокшо линийышкыже (номержым банкын официальный сайтыштыже муын кертыда) йыҥгыртыза да йодышдам рашемдыза.
М.ИВАНОВА
