Марий Эл гыч проект «Родная игрушка» всероссийский конкурсын финалышкыже лектын.
«Знание» Россий обществын Икымше-влакын толкынышт дене пырля эртарыме конкурсын «Прототипы игр и игрушек» ден «Готовая продукция игр и игрушек» номинацийлаже дене Российын 28 регионжо гыч 80 пашам кӱкшын аклыме, нунын кокла гыч иктыже – мемнан республик гыч. Тиде «Алатойс» компанийын «Космонавт-влак» картычке наборжо. Пу гыч ыштыме модыш космос да герой-космонавт-влак дене кылдалтын. Тудо йочан кидпарняже-влакым лывырташ, шинчымашыжым келгемдаш полша, тыгак патриотизм шӱлышым луктеш.
11 октябрь марте МАХ мессенджерыште финалист-влак верч калык йӱклымаш эрта. Тушко ушнышо-влак кӱкшын аклыме проект-влакым сайынрак ончалын да келшыше верч йӱклен кертыт. Калык йӱклымаште сеҥыше пашалан конкурсын стратегический партнёржо VK компаний деч специальный приз пуалтеш, тыгак ешартыш медиаполыш лиеш.
Чылаже Марий Эл гыч конкурсыш 284 йодмашым колтымо: палемдыме икымше номинаций дене – 15, кокымшыж дене – 269.
Эн шуко (20) финалист – Москва гыч.
Конкурсын кокымшо сезонжо Россий Федерацийын президентше Владимир Путинын кӱштымашыже почеш дошкольный образований системылан модышым ямдылымылан пӧлеклалтын.
Г.Кожевникова
Фотом «Знание» Россий обществын соцкылысе лаштыкше гыч налме.
