Республикысе корнылаште корным лум деч эрыктат.
Тений пӱртӱс лумым мландылан чотак пӧлеклыш. Тидыже корно пашаеҥ, тыгак верласе кучем-влаклан шагал огыл нелылыкым луктеш. Туге гынат ты тургымлан ончылгочак ямдылалтыныт: техникым ямдыленыт, верласе кучемлаште могай йӧн дене лумым кораҥдыме шотышто предприятий, организаций, озанлык-влак дене вашкылым ыштеныт.
Ончыгече У Торъял районыш командировко дене миен коштна. Лум кава гыч чарныде йоген да корнылам петырен. Эрдене эше яллаште, тыгак трассе дене кудалын эрташ нелырак ыле гын, мӧҥгеш толмына годым тиде ыш шижалт. Шуко вере корно пашаеҥ-влак автобус шогалме верлаште лумым эрыктеныт, тыгак трактор ден машина-влакат тиде пашамак шуктеныт.
– Ме «Юбилейный» ЗАО дене ий еда вашкылым ыштена, Т-150 ик трактор эн ончычак школ автобус кудалыштме корным эрыкта, вара илемыште мыняр еҥ илымым шотыш налын, черет дене тушко кусна. Нелылык лекме годым кокымшо тракторым пашашке ушена, – каласкала У Торъял муниципал округын Какшансола территориальный отделжым вуйлатыше Светлана Зверева.
У Торъял посёлко гыч Шернур кугорно марте коло кок километр кужыт корнышто Т-150 трактор дене лумым кораҥдыше тракторым ужна. Тудым «Марий Эл Дорстрой» акционер ушемын У Торъял филиалжын механизаторжо Алексей Втюрин виктарен.
– Таче эрдене ныл шагатланак пашашке лектым, – ойла Алексей Николаевич. – Калыклан пашашке кайыман, адакшым школлашке икшыве-влакым шупшыктыман. Техникым кумло шым ий виктарем, паша сайын палыме, трактор гына туткарыш ынже пурто.
Снимкыште: механизатор Алексей Втюрин.
Вячеслав Смоленцевын фотожо.
