ВАШМУТЛАНЫМАШ СЫЛНЫМУТ УВЕР ЙОГЫН

«Лудат – пеш сылне, а колыштат – йӧршын вес семын йоҥга»

Марий Эл Радио дене сылнымут передаче радион почылтмо икымше кечылаж гычак йоҥгалтеш. Тунам тудо «Поэтъял» маналтын, Володя Матвеев, Людмила Карпова вӱденыт, а тачысе «Сылнымут садвечыште» передачым журналист, поэтессе да мурызоТатьяна СОЛОВЬЕВА ямдыла. Тудын дене вашмутланымашым тыландат лудаш темлена.

 2015 ийыште Марий Эл Радиош пашаш толмекем, ик ий гыч «Сылнымут садвечыште» передачым мыланем, сылнымут дек лишкырак улшо еҥлан, кучыктен пуэныт. Тунам вияш эфирыште почеламут-влакым утларакше автор да колыштшо-влак лудыныт, мый шкежат ямдыленам, посна юбиляр-поэт-влаклан пӧлеклалтше передаче-влакат лийыныт. Радиошто передаче-влак эре уэмдалтыт, кужу жап ик шӱлыш дене илышыже икте гына – «Марий йӱла». Тачат тудо тугай, могай лийын тӱҥалтыште. «Сылнымут садвечышкат» вашталтышым пуртышна, ынде лач прозылан келшышым ыштышна, тылеч вара эреак ойлымаш-влакым лудына. Ик жап поэзий дек шӱман колыштшо-шамыч йомдаренытат ыле, «Кунам почеламутым лудаш тӱҥалына?» манын йодыныт.

– Нелеш ит нал, коклаш пурем, но вет «Сылнымут йолва» кызытат коклан-коклан йоҥга…

– Кунам радиош пашам ышташ Раисия Михайловна Данилова тольо, рушарнян кастене поэзий нерген передачыште ямдылаш тӱҥале. Но тудын уке лиймекыже, поэзий йӧршеш ӧрдыжеш ынже код манын, передаче-влак коклашке «Сылнымут йолва» изирак рубрикым пуртен колтена. Шке почеламутыштым лудаш кумылан але нунын почеламутышт эфирыште йоҥгалтышт манын шонышо-влак шукын улыт. Мыланна кажне автор шергакан. Возен кодымо почеламут-влак фондыштына шуко, кудыжым артист-влак, кудыжым возышо шке лудыт – нуным кучылтына. Эр эфирыште шинчымем годым, мутлан, мый ик шагат жапыште ик-кок почеламутым колташак тыршем.

– Прозо але поэзий – садак сылнымут, нуным посна ойырашыжат ок лий. Татьяна, палыме шуэш: а чыла ойлымашым радио дене лудаш лиеш мо?

– Радиопередачын шке ойыртемже уло, пылышлан сайын шоктыжо – тыгайым йодеш. Кажне ойлымашым радиош лукташ ок лий, кеч тудым лудат – пеш сылне, а колыштат – йӧршын вес семын йоҥга. Лудмо годым – икте, а радиолан келыштарыме – тиде йӧршеш вес тӱрлӧ произведений. Чыла шотыш налман. Лудаш ӱжмӧ профессиональный артист-влакат шке шонымашыштым ойлат, южо ойлымашым «Мыланем огеш келше» маныт да огыт луд, вет нуно мо лудмыштым эше модыт, шке шӱм-чонышт гоч колтат…

Пытартыш жапыште Алина Егошина, Светлана Сандакова, Иван Соловьев дене моткоч чак пашам ыштена. Эфирыш лукшаш произведенийым лудмо годым мый ужам, шижам, кӧ тудым лудшаш. Мутлан, тиде ойлымашым моло нигӧ огыл, лач Кузьминых лудшаш, сандене Олег Елизаровичым икмыняр гана йодаш логалын. Самырык театр гыч Зинаида Долгова, Галина Соловьева, Кристина Бирюкова ушнат. Мыскара сынан произведенийым Августа Романова, пытартыш жапыште Вера Горохова радиолан келыштарат. Теве Рауль Гарифуллин радио ешышкына ушнен, тудо лудеш, а пӧръеҥ йӱк эре ситен огыл.

– Йодмо шуэш, лудшаш произведенийым кушто кычалыда? Кузе ойыреда? Тый шкеже кажне ойлымашым лудат мо?

Л.СЕМЕНОВА

Тичмаш интервьюм 7 майыште лекше «Марий Эл» газетыште лудса.

Опубликовать в Одноклассники

Добавить комментарий