Кугыжаныш статистикын федеральный службыжын данныйже почеш, Юл кундем федеральный округысо регионла дене таҥастарымаште Марий Элыште илыме вер эн шулдакан.
2018 ий кумшо кварталыште илыме верын первичный рынкыштыже 1 кв.м кумдыкын кокла акше 34751 теҥге лийын, ты шотыштак кокла классан пачерыште – 28669 теҥге, саемдыме качестван пачерыште – 36788 теҥге, увертара Йошкар-Ола мэрийын пресс-службыжо.
Первичный рынкысе пачерын 1 кв.м кумдыкшо Татарстан Республикыште эн шергакан – 59226 теҥге, Нижегородский областьыште – 59020 теҥге. Саратов да Ульяновск областьлаште ак утыжым кугу огыл – 37007 да 39187 теҥге.
Илыме верын вторичный рынкыштыже 1 кв.м кумдыклан эн изи ак – 35044 теҥге – Чувашийыште. Таҥастарашлан, Марий Элыште – 36497 теҥге. Эн кугу ак Татарстаныште – 61455 теҥге да Нижегородский областьыште – 61327 теҥге.
М.ИВАНОВА.
