Марий Элын икымше стратегический сессийыштыже регионын ончыкылыкшым 2036 ий марте палемденыт.
Калык-влакын келшымаш пӧртыштышт Марий Эл правительстве председательын икымше алмаштышыже Дмитрий Троицкийын вуйлатымыж почеш икымше кумдаҥдыме стратегический сессий эртен. Тудо мер да кугыжаныш структур-влакын еҥыштым чумырен. Мероприятийыш тыгак кучемын исполнительный да законодательный органже-шамычын вуйлатышышт ден пашаеҥышт, муниципальный образований-влакын вуйлатышышт, деловой да науко сообществе-шамычын экспертышт ушненыт.
Заседанийыште Марий Элым 2036 ий марте социально-экономически вияҥдыме стратегийын проектше-влакым ямдылыме I да II йыжыҥже-шамычым иктешленыт. Тыгодым регионым ончыкыжат вияҥдыме тӱҥ аспект-влакым лончыленыт. Сессийыш толшо-шамыч социально-экономический шотан йодыш-влакым рашемдыме годым шке темлымашыштым луктын каласеныт.
«Палемдыме чыла паша республикысе кажне еҥын илышыжым саемдымашке виктаралтын, – палемден Дмитрий Троицкий. – Марий Элым вуйлатыше Юрий Зайцев экономикын чыла гаяк отрасльжым у кӱкшытыш лукташ задаче-влакым шынден. Тидыже регионлан кушкаш да вияҥаш сай йӧным ыштышаш».
Сессий регионлан социально-экономически вияҥаш полшышо у да сай шонымашым луктын каласыме платформо гай лийын.
Марий Элым вуйлатышын пресс-службыжын уверже негызеш Маргарита ИВАНОВА ямдылен
