Шукерте огыл пашаш колтымо Матародо почтышто ыштыше-влакын куаныштлан мучаш уке.
Чынжымак, паша условийышт чотак саемын. Отделенийым кандаш ий наре Эльвира Максимова вуйлата. Тудлан кок почтальон полша – Ирина Волкова ден Николай Ефимов. Кӱлеш годым Эльвира Николаевна шкежат почто сумкам кидышкыже налеш, вет вуйлатыше лиймеш тудат почтальонлан ыштен. Иринан аважат кужу жап ты пашаштак тыршен.
Матародышто тӱҥ шотышто марий-влак илат. Санденак тушто марий журнал ден газет-влакым налде огыт код. Мутлан, «Марий Эл» ден «Сурт-печылан» 12 еҥ возалтын гын, газетын кугарнясе кужгӱ номержым кудытын налыт. Весат куандарыш, тыште газетнам ужалыма гоч налше-шамыч эсогыл 20 нарын улыт. «Кугарня» газетым 59 еҥ налеш. Теве кодшо кечылаште ик еҥ «Ончыко» журналлан возалтын. «Ямде лий» кок суртыш толеш.
Пытартыш жапыште марий изданийлам налшыштын ийготышт кугем толеш, а самырык-влак, мом шылташ, тӱрлӧ илыш ситуацийыште каҥашым, темлымашым, йӧратымаш историйым савыктыман изирак форматан газет-влакым утларак налаш кумылан улыт. Тыште мом каласет? Ме, газет пашаеҥ-влак, тидым шотыш налына да ончыкыжым тыгак ялысе калыклан утларак пайдале да оҥайрак материал-влакым ямдылаш тӱҥалына.
Cветлана Носова
Снимкыште: Матародо почтын пашаеҥже-влак.
Авторын фотожо.
