27 январьыште, Кугу Отечественный сар годым Ленинград олам фашист блокаде гыч утарымылан 80 ий темын. Ты исторический датым уло кугыжаныш калыкна палемден. Марий Эл вуйлатыше Юрий Зайцев, правительстве председательын икымше алмаштышыже Михаил Васютин Санкт-Петербургысо Пискарёвский мемориал шӱгарлаште эртыше торжественно-траурный церемонийыште лийыныт, Кугу Отечественный сар годым Ленинградым аралымаште Марий кундем гыч участвоватлыше да вуйым пыштыше салтак-шамычлан Шарнымаш аллейысе плита воктеке пеледыш аршашым пыштеныт.
Санкт-Петербургышто «Ший корно» марий калыкле-тӱвыра автономий ден Санкт-Петербургышто Марий Элын полномочный представительствыже тыгак блокадым кӱрлмӧ дене кылдалтше шарнымаш мероприятий-влакым эртареныт. Автономийын тыршымыж денак Пискарёвский шӱгарлаште Марий кундем гыч Ленинградым аралымаште колышо 125 еҥын лӱмжым пален налме. Варажым тудынак «Мы вместе защищали Ленинград» Шарнымаш книгам савыктен лукмекыже, чылаже эсогыл 44767 землякнан лӱмжӧ рашемын. Санденак «Ший корно» организацийын темлымыж почешак, Марий Эл правительстве 2020 ий сентябрьыште ты Шарнымаш плитажым почаш полышым пуэн.
Регион вуйлатыше тыгак «Ленрезерв» экспозицийым ончал савырнен. Тушто военный ретротехнике, саркурал коллекций, сар годым Ленинградыште илыше-влакын кучылтмо арверышт да исторический документ-влак ончыкталтыныт.
Ошыгечынже Юрий Зайцев Сымыктыш историй институтышто «Ший корно» автономийын еҥже-влак дене вашлийын. Тудым Санкт-Петербургышто Марий Элын полномочный представительже Елена Таникова организоватлен. Михаил Васютин мемнан республик да Санкт-Петербург ола ден Ленинград область коклаште вашкылым пеҥгыдемдыме дене кылдалтше ыштышаш ошкыл влак дене палдарен. Лач нине йодыш йырак тушто мутланымаш каен.
«Йӱдвел рӱдолаш толмо годым кажне гана тыште илыше марий-шамыч дене вашлияш, формальный огыл обстановкышто калыкнан тӱвыражым арален да вияҥден толмо дене кылдалтше йодыш-влакым каҥашаш жапым муашак тыршем. Марий Элыште огыт иле гынат, тусо марий-влак шке шочмо кундемышт, кугезышт-влак нерген огыт мондо, йӱлаштым шуен толыт. Марий землячествын еҥже-влакын чолгалыкышт, пашам йӧртамышт, поро улмышт дене кугешнем. Шочмо кундемыштым веле огыл чапландарат, у паша кылым кычалыт, СВО кайыме зоныш гуманитар полыш денат коштыт. Пеш кугу тау тыге шокшын вашлиймылан да шочмо кундемым йӧратымылан!» – возен Юрий Зайцев шке Телеграмм-каналыштыже тиде вашлиймаш нерген.
Елена Таникова пытартыш кок ийыште Санкт-Петербургышто республикын полномочный представительствыжын пашажым иктешлен. Вашлиймашке толшо-шамычат йодышым пуэденыт, икмыняр темлымашым ыштеныт. Мутлан, марий ешла гыч марий йылмым тунемме онлайн-курсыш коштшо икшыве-влаклан Марий Элыште эртыше образовательный ден творческий программылаш ушнаш йӧным ышташ йодыныт. Тыгак Елена Таникова регион вуйлатыше деке Марий кундем гыч СВО-што вуйым пыштыше землякнан ешыжлан полшаш йодмаш дене лектын.
Марий Эл вуйлатышын администрацийжын Информаций паша пӧлкажын уверже негызеш С.Носова ямдылен.
