КУЧЕМЫШТЕ

Лӱддымылыкым ончыктымыштлан тауштеныт

Марий Эл гыч икшыве-герой-влак Федераций Советын наградыже-влак дене палемдалтыныт.

Тиде церемонийыште республикысе правительстве председательын икымше алмаштышыже Михаил Васютин, РФ Федеральный Собранийын Федераций Советшын председательжын алмаштышыже Константин Косачев ден Федераций Советын обороно да лӱдыкшыдымылык комитетшын председательжын икымше алмаштышыже Сергей Мартынов лийыныт.

Рвезе-влакын тений ыштыме геройло пашашт уло элыште илыше-влаклан пример лийын.

Йошкар-Оласе А.С.Пушкин лӱмеш 4-ше №-ан гимназийын 9-ше классыштыже тунемше  Александр Егоров тений кеҥежым вӱд йымаке каяш тӱҥалше кок ӱдырым утарен.

Томаша Изи Какшан эҥерын Южный пляжыштыже лийын. Йӱштылаш пурышо ӱдыр-влак кокла гыч иктыже кенета вӱд йымаке каяш тӱҥалын. Тидым ужын, йолташ ӱдыржӧ полшаш вашкен. Но келге вӱдыштӧ трукышто ӧрткен да нимом ышташ ӧрын. Ты жапыште рвезе тораште огыл лийынат, тидым ужмеке, вигак вӱдыш тӧрштен да когыньыштымат утарен.

Волжск олаште Российын Геройжо Валерий Иванов лӱмеш 2-шо №-ан школын 11-ше классыштыже тунемше   Вячеслав Акимов чодыра пожар тӱҥалмым чактараш полшен.

9 майыште чодыраште тул ылыжын. Вячеслав ден йолташ рвезыже тидым ужыныт да тыманмеш утарыше службыш йыҥгыртеныт. А пожарный-шамычын толын шумешкышт тул дене шке вийышт дене кучедалыныт, вараже нунылан полшеныт. Тыге рвезе-шамычын тыгай койышым ончыктымышт дене тулым писын йӧртен кертыныт.

Константин Косачев Александр Егоровлан Федераций Советын «За проявленное мужество» медальжым, а Вячеслав Акимовлан Федераций Совет председательын алмаштышыжын Тауштымашыжым кучыктен. 

Сенатор рвезе-шамычын лӱддымылыкым ончыктымыштлан, весын ойгыжым сеҥаш полшымыштлан, а нунын ача-аваштлан тыгай сай, поро айдемым ончен куштымыштлан тауштен.

Церемоний мучаште нине икшывын ача-аваштлан Марий Элын Образований да науко министерствыж деч Тауштыман серышым кучыктеныт.

 

Марий Эл Республикым вуйлатышын организаций да аналитике виктемжын уверже негызеш

Л.Камалетдинова ямдылен

Опубликовать в Одноклассники

Добавить комментарий