Тачысе темылан
Кӱлешан йодышым кӱлын ончыман
Марий Эл вуйлатыше «МЭТР» телеканаллан пуымо интервьюшто республикын ошкылжо да ончыкылык планже нерген каласкален. Тушто кызытсе кӱлешан йодышлам тарватыме.
Топливе
Бензин ситыдымаш, заправкысе кужу черет республикыше илыше чыла гаяк еҥым тургыжланаш таратеныт. Ты нелылык гыч лекташ «Марий Эл топливе» сервис ышталтын. Тудын гоч автомобилист-влак могай заправкыште горючий улмым, черет да ак нерген пален налын кертыныт. Заправкылаште нунылан волонтёр-влак полшеныт. Тыге горючий ситыдыме деч кораҥ кертме.
Ялозанлык
Регион вуйлатыше ялозанлык сатум ыштен лукшо-влак дене вашлийын, могай нелылык улмым рашемден. Горючий шапашым ыштен кертме, шурным погымо паша кая. А тиде йодыш кызыт тӱҥ лийын кодеш.
Корно
Идалык мучаш марте эше 260 километр корным шотыш кондыман. Чыла паша график почеш кая.
Республикым тӱзатымаш
У ФАП-влак чоҥалтыт, эҥер сер, парк ден каныме вер-влак тӱзаталтыт. Вич ий жапыште 50 школын 52 зданийже олмыкталтын. У тунемме вер-влак Волжскышто, Йошкар-Олаште, Килемар округышто да моло муниципалитетыште чоҥалтыт. «Йоча-влаклан чыла ыштыман, вет нуно ончыкылыкна улыт», – палемден Юрий Зайцев.
Тазалык
«Тазалык пункт-влак» пашам чолган ыштат, «Онкопатруль» ден «Кардиопатруль» программе-влак шукталтыт. Нуно олалаште веле огыл, тыгак посёлко ден яллаште пашам ыштат. «Тазалык пунктышто» 2022 ий годсек республикыште илыше 60 утла тӱжем еҥ лийын.
СВО участник-влак ден нунын ешыштлан
Спецопераций каен шогымо кундемыш, тушто улшо-влакын йодмыштым шотыш налын, 70 утла партий гуманитар полышым колтымо.
Марий Эл ешарен газифицироватлыме программым илышыш пуртен толмо дене ончылно кая. Республикыштына СВО-н ветеранже ден тудын участникше-влакын ешыштлан участке чек деч пӧрт марте газ пучым шупшаш 100 тӱжем теҥге полыш пуалтеш.
«Марий кеҥеж»
Ты фестиваль визымше ий почела эртаралтеш. Тудын географийже палынак кумдаҥын. Йошкар-Ола гыч артист-влак республикысе район ден округлашке лектыт, кугу концертым ончыктат.
Сайлымаш
Марий Эл дистанционный электрон йӱклымашлан эҥертыше регион-влак радамыш пурен. Тыгай йӧн дене пайдаланаш 14 сентябрь марте Госуслуго гоч регистрироватлалташ лиеш. Юрий Зайцев палемден: мемнан ойырымо депутат элнан парламентыштыже мемнан верч шоген да республикланна вияҥашыже полшен кертше лийшаш.
Мучашлан тудо ешарен: план ден задаче шуко, да нуно чылан регионым вияҥдыме дене кылдалтыныт – правительстве тидым кӱлын онча.
Юрий ИСАКОВ ямдылен.
Денис Речкинын фотожо.
