Тений Марий Элыште республикын бюджетше кӱшеш эше 10 комплексный пӱртӱс памятниклан аралыме зоным ыштат.
Нине кумдык-влак Шидыяр, Большеозёрский, Куплоҥга, Тыр, Пошкит, Криуль, Сорочинский, Кугу, Куртньӧ да Куэ куп-влак йыр лийыт. Тачысе кечылан нине памятник пеленысе аралыме кумдык-влакын чекыштым палемденыт, тусо мландым кучылтмо да аралыме режимым рашемденыт да положенийым пеҥгыдемденыт. Тидын шотышто Марий Эл вуйлатышын «Марий Эл Республикыште республиканский значениян пӱртӱс памятник-влакын аралыме зоныштым ыштыме нерген» указшын проектшым Юл кундем федерал округысо Чодыра ознлык департамент, Вӱд ресурс федерал агентствын Верхне-Волжский БВУ-жо, Кол кучымаш федерал агентствын Юл-Виче территориальный управленийже, РФ Обороно министерстве, республикысе муниципал образований-влакын администрацийышт дене согласоватленыт. Кызыт ты проект – Марий Эл Правительствыште.
Ончыктен кодыман, тачысе кечылан Марий Элыште республиканский кӱкшытан 14 тыгай пӱртӱс памятниклан аралыме зоным ыштыме.
С.Носова
Фотом Марий Эл правительствын сайтше гыч налме
