«ИНТЕЛЛЕКТУАЛ» тӱвыра-увер рӱдер» автономный коммерческий огыл организаций «Кувавайын шондыкшо. Бабушкин сундук» республик кӱкшытан кумшо конкурсым эртара.
«Йоча усталык», «Кова ден коча-влакын опытышт», «Калык кидмастар-шамыч», «Мемнан салтакна-влаклан уло шӱм-чон дене» номинацийлаште кум ияш деч кугурак ийготан кажне еҥ мастарлыкшым веле огыл, тыгак порылыкшо ден йӧратымашыжым кумдан почын ончыктен кертеш. Конкурсант-шамычын кумылышт уло гын, пашаштым Марий Элыште верланыше Шкет илалше-влакын пӧртлашкышт коча-кова-шамычлан да военный спецоперацийын участникше-шамычлан колтат.
Кидпашам тений 20 декабрь марте Йошкар-Ола, Машиностроитель урем, 6-шо Б №-ан пӧрт, 105-ше офис («ИНТЕЛЛЕКТУАЛ» ресурс рӱдер) адрес дене налыт. Вашкыл телефон: +79991453876 (Эльвира), +79278818060 (Эльза). Электрон почто: kuklina-10@mail.ru.
Конкурсыш кеч-могай пайдале кидпашам (носким, пижергым, шовычым, калпакым, шарфым) але арверым колташ, тыгак пеленже серышым пышташ лиеш, поснак – «Мемнан салтакна-влаклан уло шӱм-чон дене» номинацийлан.
Конкурсын кышкарыштыже «Национальный гостиный» форматыште усталык паша ончер онлайн да офлайн йӧн дене эрта. Мероприятийыш ушнышо-шамыч диплом дене палемдалтыт, а поснак ойыртемалтше-влаклан шарнымашан пӧлекым, ты шотыштак брендлан шотлалтше «Кувавайын шондыкшо. Бабушкин сундук» сувенир шотан шондыкым кучыктат.
М.ИВАНОВА
