Йошкар-Олаште «Абилимпикс» национальный рӱдер ден «Россия – страна возможностей» автономный коммерческий огыл организацийын полшымышт дене Марий Элын Образований да науко, Калык илышым саемдыме шотышто министерствыже-влакын, «Абилимпикс» толкыным вияҥдыме региональный рӱдерын организоватлымышт почеш «Абилимпикс» чемпионатын регионысо йыжыҥже очно эртен.
Таҥасымашке 14 ияш деч кугурак ийготан 160 еҥ ушнен. Инвалидностян школьник ден студент-влак, предприятий ден организаций-шамычын специалистышт пум пӱчкедыме, бисер дене пидме, ландшафт дизайн, име дене пидме, крючок дене пидме, сылнын тӱрлымӧ, столяр паша, маляр паша, йолчиемым олмыктымо, ургызо да моло компетенций дене мастарлыкыштым тергеныт.
Чемпионатым иктешлыме почеш, 32 участник 25 компетенцийыште сеҥышыш лектын. Нунын коклаште Калык илышым саемдыме шотышто министерствын ведомствышкыжо пурышо тӧнежлаште илыше-влакат улыт, тиде – пум пӱчкедыме компетенцийыште 2-шо верым налше Михаил Овчинников ден 3-шо верыш лекше Анатолий Чемеков, изобразительный искусство компетенцийыште 3-шо вер дене палемдалтше Инна Батурина, име дене пидме компетенцийыште 2-шо верым сеҥен налше Галина Бастракова.
Сеҥыше-влаклан шергакан пӧлекым, медальым, дипломым да Марий Эл правительствын грантшым кучыктеныт.
– «Абилимпикс» чемпионатын кажне участникше шкенжым уста профессионал семын ончыктыш. Нуно чыланат сеҥыше улыт – кажныже лӱддымылыкшӧ да мастарлыкше дене ойыртемалте, – мероприятийым иктешлен калык илышым саемдыме шотышто министр Марина Островская.
М.ИВАНОВА
