Республикысе профессионал образованийым пуышо организацийлаште тенийысе приёмный кампаний умбакыже шуйна. Юл кундемыште шуко профилян ик эн кугу вузлан шотлалтше Юл кундем кугыжаныш технологий университетыште тудо элысе моло тунемме вер семынак июнь кыдалне тӱҥалын. Таче ПГТУ могай у направленийлам темла, июль тӱҥалтышлан мыняр йодмаш пурен, могай факультетыш тунемаш пураш кумылан эн шуко – тиде да моло нерген вузын приёмный комиссийыштыже латкудымшо ий пашам ыштыше, кызыт ответственный секретарьын сомылжым шуктышо Антон Бушмелев (снимкыште) дене вашталтышна.
– Антон Аркадьевич, приёмный кампаний мучаш марте эше жап уло гынат, палыме шуэш: июль тӱҥалтышлан вузышто тунемаш кумылан самырык еҥ-влак деч мыняр йодмаш пурен?
– Кудымшо июльлан бакалавриат ден специалитетыш очно тунемаш пураш чылаже 2550 йодмаш пурен. Тидыже, ӱмашсе тыгаяк жап дене таҥастарымаште, кокшӱдылан шукырак.
– Тиде чот гыч шукынжо могай факультетыште шинчымашым погаш кумылан улыт?
– Палемдыме жаплан бакалавриатыш эн шуко йодмаш – 471 – информатике да вычислительный технике факультетыш пурен. Кокымшо верыште – управлений да право факультет, 6 июльлан тушто тунемаш кумылым 412 еҥ ончыктен. Кумшо верыште – экономике факультет, тушко палемдыме жаплан 356 йодмашым налме.
– Нине факультет-шамыч абитуриент-влак коклаште тений гына кумдан «чапланыше» улыт але ончычат сӱрет тыгаяк лийын?
– Информатике да вычислительный технике факультетыш тунемаш пурышо-влак шукын лийыныт. Тушто кум направлений дене специалистым ямдылат: «Программный инженерий», «Информатике да вычислительный технике» да «Автоматизироватлыме системын увер лӱдыкшыдымылыкшӧ». Нине IT- специальность-влак дене тунемаш пураш кумылан-влак ынде пытартыш икмыняр ийыште шукын улыт.
– Тений Юл кундем кугыжаныш технологий университет могай у направленийым темла?
– У направлений-влак улыт. Тиде – «Самырык-влак дене пашам организоватлымаш», «Российыште регионоведений», «Илаш йӧным ыштыше йӱкшыктарыме технике», «Публичный политике». Бакалавриатыште очно эше ик направлений лиеш – «Конфликтологий», тудо тымарте магистратурышто гына лийын.
– Тендан шонымаште, тачысе абитуриент приёмный кампаний тургымышто тӱҥ шотышто могай нелылык дене вашлиялтеш?
– Нелылык шотышто ойлаш гын, тыге тӱҥалман, шонем. Кунам уло мом ойыраш – тиде сай. Адакшым ойырышашлык корныжо моткоч шуко. Тиде сай, но тыгодымак нелылыкым луктеш: нунын кокла гыч иктыжым, тудлан гына келшышым да кӱлешаным самырык еҥлан ойыраш куштылго огыл. Иктешлыше кугыжаныш экзаменат нелылыкым луктеш, молан манаш вузлашке документым пуымо кечат икгай лиеш. Тыгай годым абитуриент тышке-тушко куржталаш тӱҥалеш: мутлан, тудо республик деч ӧрдыжыш, элын рӱдолашкыже, тунемаш пурынеже, но тыгодымак «ала пурен ом керт» ман шона. Вет ик вере баллже ок сите гын, вес вере документым намиен шуктыман… Сандене ямдылалтман, кумыл гына ок сите – чылажымат ончылгоч ужын моштыман, экзаменысе балл сита але уке – пачаш-пачаш тергыман, документым чын погыман. Уке гын нигушкыжат тунемаш пурен от керт. Тунемме вер шуко, но чын ойырен моштыман, шинчымашым тергыме результатлан анализым чын ыштыман.
– Абитуриентлан тыгай годым ача-ава-влакын полышышт кӱлеш, маннеда?
– Полышым пуыман, но могайым – сайын палыман. Туге, кызыт электрон йӧн дене документым пуаш лиеш: мутлан, Владивосток гыч суткан кеч-могай жапыштыже интернет полшымо дене Москваш але Калининградыш. Туге гынат ме «Шкак кондыза» манына. Молан тыге ойлена, шонеда? Самырык еҥ-влак кокла гыч чыланжак тунемаш пурымо шотышто «шанс» манметым грамотнын шотлен луктын огыт керт, тидым ышташ нунылан да ача-аваланат неле. А мемнан вузын технический секретарьже да приёмный комиссийыште пашам ыштыше-влак тидым ыштен кертыт. Конешне, телефон дене йыҥгыртен йодашат лиеш – вашештат, но тудын гоч мутланымашым шинчаваш вашлиймаш дене таҥастараш огеш лий. Приёмный комиссийыш толмеке, абитуриент шуко ешартыш уверым налын кертеш: тунемаш пурымо шотышто веле огыл, тыгак вузын илышыже нергенат. Адакшым тений ме ковид шарлыме деч ончычсо йӧныш кусненна: чыла документым (копий дене пырля оригиналымат) кондыман.
– Тений гыч Украиныште эртыше спецоперацийын участникше-влакын икшывыштлан Российын вузлашкыже тунемаш пураш специальный квотым пуртымо. Тиде йӧн дене йодмаш пурен мо?
– 6 июльлан ик йодмаш уло.
– Антон Аркадьевич, вузын приёмный комиссийыштыже латкудымшо ий пашам ыштеда. Ий гыч ийыш паша куштылем толеш але нелемеш?
– Латкуд ий ончыч тунемаш налме дене кылдалтше правил латкок лаштыкыш пурен, а кызыт – шӱдӧ утла: ий гыч ийыш паша процесс нелем толеш, молан манаш гын эре у пурталтеш. Мутлан, пытартыш кок ийым – ковид жапым – налаш гын, шуко вузлан кок тылзыште дистанций йӧн дене туныкташ тунемаш логалын. Икманаш, кажне ий могай гынат «сюрпризым» конда, тӱҥ шотышто тудо нормативно-правовой базыш вашталтышым пуртымо дене кылдалтын. Кажне ийын ик семын пашам ыштена манаш ок лий, эре у семын, сандене чылалан тунемалтын.
– Тыгай «шокшо» пагытыште вашмутым пуаш жапым мумыланда тау. Пашада лектышан лийже.
– Тау.
Г.Кожевникова
Авторын фотожо
