31 октябрь – 2 ноябрьыште Йошкар-Олаште Марий калыкын XII погынжо лиеш.
Ныл ийлан ик гана эртаралтше, уло Россий гыч марий-влакым чумырышо ты кугу форум тений Ешын идалыкшылан пӧлеклалтеш. Тиде амал денак тушто палемдыме вич секцийжат лач ты теме денак кылдалтыныт: «Еш да йӱла», «Еш да тӱвыра», «Еш да шинчымаш», «Еш да тазалык», «Еш, науко да цифровизаций». Погыныш чылаже Российын 20 регионжо гыч 430 делегат толшаш.
Теҥгече Марий Эл вуйлатыше Юрий Зайцев Погын дене кылдалтше оргкомитетын заседанийжым эртарен. Тушто организационный, дискуссионный площадке-влак да тӱвыра программе дене кылдалтше йодыш-влакым ончен лектыныт.
«Тыгай погын-влак республикынан этнокультурный поянлкышым пойдарен толмаште, марий калыкнам вияҥдымаште исполнительный ден законодательный, верысе кучем-влакын тӱрлӧ кӱкшытан органыштын пашаштым саемдаш шонымаш дене темлымаш-влакым каҥашаш площадке семын ончыман», – каласен регион вуйлатыше.
Юрий Зайцев Погынын оргкомитетшылан тауштен да мероприятий сай кӱкшытыштӧ эрта манын, ӱшаным ыштен.
Марий Эл вуйлатышын пресс-службыжын уверже негызеш С.Носова ямдылен.
