Килемар район Церкысола кундемысе Поста сир манме курык тайылыште латшымше гана регион-влак кокласе «Кугезе мланде» фольклор да этнографий фестиваль эртен.
Тудо Килемар кундемын брендышкыже савырнен манаш гын, чынрак лиеш. Ты ганат тушко элнан тӱрлӧ кундемже – Угарман, Виче, Чуваший, Татарстан гыч, тыгак республикысе районла ден олала гыч – усталык коллектив, кидмастар-влак миеныт. Сценыште самодеятельный артист-влак шке койышыштым ончыктеныт гын, а йырысе кумдыкышто кидмастар-влакын ярмиҥгашт гӱжлен. Ончышыжо ончен, налшыже налын. Келшыше сатум пӧлеклан ма шкалан – ойырен налаш йӧн лийын. Олык лапыште участник-влак пеленышт кондымо пайрем чесан ӱстелым поген, уна-влакым сийленыт.
Тений фестиваль Шочмо элым аралышын идалыкшылан да Кугу Сеҥымашлан 80 ий теммылан пӧлеклалтын. Сандене выступлений-влак ты кок тематике дене кылдалтыныт, концертшат «Тукымвожын вийже» маналтын. Погынышо-влакым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов, Килемар муниципал округым, администрацийжым вуйлатыше-влак Сергей Преснецов, Татьяна Обухова да молат саламленыт. Константин Иванов Марий Эл вуйлатыше Юрий Зайцевын саламлымашыжым йоҥгалтарен да тыгай фестивальын кӱлешлыкшым палемден. Вара пагалыме уна-влак шкештат ярмиҥгаш толшо-влакын ыштыш-кучыштым ончен савырненыт.
Фестиваль Килемар велне 2008 ий гыч эртаралтеш да кажне ийын утларак участникым чумыра. Марий Элын Тӱвыра, савыктыш да калык-влакын пашашт шотышто министерствын пресс-слубыжын увертарымыж почеш, тушко тений 5 тӱжем наре еҥ миен. Фестиваль этнодискотеке дене мучашлалтын.
Снимкыште: фестиваль годым.
Фотом Марий Эл правительствын официал лаштыкше гыч налме.
