Кугече – шошо пагытын эн кугу пайремже. Акрет годсек коча-кована-влак ты пайрем жапыште, йырваш ылыжше пӱртӱсым эскерен, ончыкылык илышлан акым пуэн моштеныт. Нуно Кугече пайремын вий-куатшылан ӱшанен, чон да сурт-оралте арулыкым кученыт. Аралтышым, илыш серлагышым, еш пиалым йодын кумалыныт, йӱла радамым шуктеныт. Меат тиде кугезе йӱлам кучен илена.
Иза-шольо, ака-шӱжар, тулар-тулаче-шамыч, тендан кумылда порсын лӱҥгалтыш дене Йӱксӧ кашта марте нӧлталт шогыжо. Кугече муно гай пӧрдын йывыртен, чумыр илыза. Ташлама пура корка гай илышда шоҥешталт, тӱзланен шогыжо. Кугече Юмо поро кумылдам Ош Сандалыкыште нӧлтен шогыжо. Кугече пайрем дене!
Марий Элын тӱҥ онаеҥже Александр Таныгин
Михаил Скобелевын фотожо
