21 сентябрьыште Йошкар-Оласе «Марий кумалтыш» общине Шернур кугорно воктенысе Тумер отышто Мер кумалтышым эртара.
Республикысе Марий рӱдӧ юмыйӱла ушемын увертарымыж почеш, ты кечынак Кужэҥер район Пекесола, Марий Турек район Памашъял, Советский район Ваштаршӱ ялласе отылаште кумалме йӱлам шуктат.
26 сентябрь – Марий Турек район Павайнурышто;
28 сентябрь – У Торъял район Купсола, Советский район Кукмарий ял, Шернур район Пӱнчерйымал, Нурсола ял отылаште;
5 октябрь – Кужэҥер район Тумньымучаш, Параньга район Тошкемнур, Советский район Шуймучаш ден Яҥгранур, Пивактын почиҥга отылаште;
Шернур район Лажъял мер отышто; Турек Суртанлан вуйым савымаш;
9 октябрь – Советский район Кугунур ял отышто;
26 октябрь – У Торъял район Кузнеч отышто (кугу кумалтыш) да Советский район Пӱнчеран отышто Тӱня кумалтыш (Яҥгранур ял); Шернур район Кугу Торешкӱвар ден Марий Турек район Кӱшыл Мосараште;
2 ноябрь – У Торъял район Кӱанпамаш ял отышто (кугу кумалтыш).
Радам ешаралташ тӱҥалеш.
12 октябрьыште Калтаса район Актыган ял воктенысе Шукын курыкышто кугу кумалтыш лиеш. Шукын Курык Кугызалан специальный военный операцийыште улшо салтак-влак верч, вашкерак ты умылыдымаш пытыже манын, вуйым савен кумалыт. Тыгай кумалтыш кум ий ончыч эртаралтын. Тидын нерген тусо онаеҥ Радислав Зайнетдинов шке воткыл лаштыкыштыже серен. Йӱлам эртараш СВО-што лийше, тушто улшо сарзе-влак да родо-тукымыштат йодыныт.
Снимкыште: Тошкемнур отышто -кумалтыш годым.
Светлана Носован фотожо.
