Тений 8 сентябрьыште Волжский районысо Пызырьгуп ялыште илыше Елена Александровна Иринева (снимкыште) 101 ияш лийын!
Е.Иринева – Кугу Отечественный сарын участникшын тулык ватыже, тылын труженикше, сай ава, тӱткӧ кова.
Елена Александровна Морко районысо Шеҥше селаште шочын. Верысе школышто 9 классым тунем пытарымыж деч вара Морко педагогический училищыште шинчымашым поген: кӱчык курс-влакым эртен да 1941 ий 15 августышто направлений дене Волжский районысо Пызырьгуп ялыш толын. Ончычшо 2-шо классыш коштшо ӱдыр-рвезе-шамычым туныктен, вара тӱҥалтыш школын вуйлатышыжлан шогалтеныт. Сулен налме канышыш лекмекыже, библиотекарьлан ыштен.
22 ияш ӱдыр 1945 ий 6 апрельыште фронтовик Геннадий Михайловичлан марлан лектын. Пиалан ешыште кум эрге ден кум ӱдыр шочыныт. Вате ден марий Ириневмыт озанлыкым кученыт, пашам шуко ыштеныт, икшыве-влакым йол ӱмбаке шогалтеныт – кажныжым туныктен луктыныт. Ешыште педагог-влакат, военный-шамычат улыт. Сарыште иланен кертдымын сусыргышо суртоза вуйжым нигунамат сакен огыл, тудо шуко лудын, тӱрлӧ кушкылым, эсогыл виноградым, ончен.
Кызыт Елена Александровна шешкыже Антонина Алексеевна дене ила. 101 ияш ӱдырамашын 12 уныкаже, уныкаже-шамычын 30 шочшышт улыт. Поро шӱм-чонан кова чылаштым моткоч йӧрата да кажныж дене кугешна. Вачӱмбакыже курым утла ийым пыштен гынат, озанлыкыште сомылкам шукташ полша, телевизор дене тӱрлӧ передачым онча, газетым лудеш.
Лӱмгече оза тыгак унам ончаш, мутланаш, марий мурым мураш да сем почеш тавалташ йӧрата. «Пеш поро айдеме, сай пошкудо, уста ӱдырамаш, марий йӱлам пала да тудын дене молымат кумылын палдара», – маныт пошкудыж ден родыжо-шамыч.
Елена Александровнам шочмо кечыж дене Марий Элын калык илышым саемдыме шотышто министржын алмаштышыже Дмитрий Солдатов, Волжский район администрацийым вуйлатышын алмаштышыже Сергей Сычев да Волжский районысо калыкым социально обслуживатлыме комплексный рӱдерын директоржо Галина Токманова шокшын саламленыт. А Пызырьгуп Тӱвыра пӧртын пашаеҥже-влак лӱмгече озам сылне концерт программе дене куандареныт.
М.ИВАНОВА
Фотом Марий Элын Калык илышым саемдыме шотышто министерствыжын сайтше гыч налме
