АКЦИЙ КОНКУРСЫ

«Коваем – кидмастар»

«Коваем – кидмастар»

Ӱдырамаш-влакын тӱнямбал кечышт вашеш Йошкар-Оласе калык-прикладной сымыктыш тоштерыште кидмастар-шамычым ушышо «Коваем – кидмастар» тӱвыра акций эртен.

Мероприятийыш кидмастар кова-влак уныкаштымат пеленышт конденыт. Теве Лиза ден Арина Опаринамыт Озаҥ гыч улыт, Алена Бурманова ден коваже Любовь Евстафьевна Рябчикова Йошкар-Олаште илат. Нуно чыланат жапым пайдалын эртараш мастер-классыш толыныт. Йоча-влак ава-коваштлан пӧлек шотеш кагаз гыч модыш атым, курчакым ямдыленыт. Тидланже нуным кидмастар Наталья Евгеньевна Смирнова (ты тоштерыштак тырша)  тыманмеш туныктыш. Тыге ава, кова-влак йочаштым, уныкаштым изинек кидпашалан кумылаҥдат, мастар тукымым куштат.

 Мероприятий кышкарыште уна-влакым  Йошкар-Оласе 3–шо №-ан школышто технологий да рисований дене туныктышо  Людмила Ионовна Матвееван «Курчакым ыштыше мастар» лӱман ончерже дене палдарыме. Тушто интерьерлан келшыше пидме да ургымо, тӱрлӧ форман (мутлан, конус гайымат кучылтмо) марий да руш вургеман курчак-шамычым погымо, нунын коклаште аралтышат уло. Вигак коеш: Людмила Ионовна ургашат, пидашат пеш мастар.

– Курчак мыйым вичкыж шӱртӧ семын эн сылне пагытем – изи годсо жапем – дене уша. Тудым ынде йывыртен шарналташ веле кодеш. Курчакым ыштымем годым чонем дене пуйто ик татлан тусо жапыш пӧртылам,  – каласыш Людмила Ионовна.

Тоштерын икымше пачашыштыже йоча-влакым вес кидмастар вучен. Тиде Алефтина Фёдорова. Тудо самырык тукымым мастарлык секретше дене палдарен: тасмам, шерым погымо  шотышто каласкален. Мутлан, тасма дене мом гына ышташ ок лий улмаш?!

Палемдыман, тоштер пелен Йошкар-Оласе кидмастар-влаклан «Шокшо чонан ӱдырамаш» лӱман клубым чумырымо. Тудыжым лач Алефтина Анатольевна вуйлата. Уста еҥын ойлымыж почеш, тений илалше кидмастар-шамычлан «Ший волонтёр-влак – Марий Элын шӧртньыжӧ» федерал проект почеш шер дене ыштыме мастер-классым эртараш палемдыме.

Мероприятий мучаште изи ӱдыр-влак кидпашаштым коваштлан пӧлеклышт. А нуныжо э-э йывыртеныт вет! Каласыман, илалше ӱдырамаш-шамыч тӱрлӧ инфекций деч аралалташ чийыме маскыштымат тасма дене сӧрастареныт, тыгеат мастар улмыштым палдареныт.

Пӧлекым налмеке, кажне кова уныкаж нерген каласкален, а нунышт тӱрлӧ кундемыште илат. Алефтина Анатольевнан уныкаже-шамыч Мурманск олаште илат. Настя уныкаже коважын пашажым шуя.

Краснооктябрьский посёлко гыч Люда коват моктанен каласыш:

– А мыйын визытын улыт!

Йошкар-Ола гыч Аня кова вич ияш Ульяна уныкаж нерген ойлыш… Тидын деч вара ӱдыр-влак ава да шке нерген почеламутым лудыч. Тоштер вуйлатыше Татьяна Матвеевнат кок уныкаж нерген каласыш. Чылаштым колыштын, иктешлымаш тыгай гына: кажне ковалан уныкаже эн шерге.

 

М.Скобелев

Авторын фотожо

Снимкыште:Изи кидмастар-влакым куштат

Опубликовать в Одноклассники

Добавить комментарий