Шернур районышто паша дене коштмыж годым Юрий Зайцев «Лӱдыкшыдымӧ да качестван автомобиль корно» нацпроектын кышкарыштыже Шернур-Казанский-Кукнур корным олмыктымо пашамат аклен.
Транспорт да корно озанлык министр Александр Герасименкон увертарымыж почеш, тений 30 километр наре автомобиль корным нормыш кондат. Чыла пашам августышто мучашлаш палемдыме.
Ю.Зайцевлан корным олмыктымо да чоҥымо качествым тергыше куснылшо лабораторийын пашажым ончыктеныт. Корно шартышын пробыжым республикым вуйлатышын пашажым жаплан шуктышын ончылныжак налыныт.
Олмыктымо але чоҥымо корнын качествыжым тергыме годым шартышын кӱжгытшӧ, тӧрлыкшӧ да тайылже-влак шотыш налалтыт.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
