Ныл ой ончыч 21 сентябрьыште Марий Элын у вуйлатышыже Александр Евстифеевын инаугурацийже лийын.
Эртыше пагытым шергал ончалаш гын, ныл ий жапыште республикыште ончыко ошкыл шагал огыл ышталтын. Тиде, мутлан, уэмдыме аэропорт, чоҥалтше у автовокзал, Перинатальный рӱдерын у корпусшо, Киров ден Строитель уремлам ушышо чапле магистраль корно …
Нунын нерген посна, эше ик гана радамлынрак ойлаш гын, ончыч аэропорт жапын-жапын веле пашам ыштен. А у вуйлатыше толмо дене уэш самолет-влак чоҥештылаш тӱҥалыныт. Ончыкыжым тушто у пассажирский терминал лийшаш. Тудым 2022 ийыште ышташ тӱҥалыт.
Вашке Йошкар-Олаште у автовокзал шке омсажым почшаш. Тиде вучымо тат тений ноябрьыште толын шушаш. Вокзалыште 100 еҥлан вучаш келыштарыме зал, 40 автобуслан стоянке лийыт.
Тенияк, декабрьыште, Йошкар-Олаште Перинатальный рӱдерын жаплан келшыше у корпусшо пашам ышташ тӱҥалшаш.
Тиде направлений нерген умбакыже ойлаш гын, Волжск оласе рӱдӧ эмлымверыште азам ыштыме отделений чоҥалтеш. Тудым шушаш ийын августышто почаш палемдалтеш.
Йошкар-Олаште Киров ден Строитель-влак уремлам ушышо магистраль корно чоҥалтеш. Тушто ныл полоса лиеш. Кужытшо – 4 километр, лопкытшо – 15 метр. Тудо олан промышленный ден «спальный» манме ужашыштым уша. Тиде пашан икымше йыжыҥжым 2022 ийыште мучашлышаш улыт. Тудын кузе шукталтмыжым Марий Эл вуйлатыше эреак «шинча ончылныжо» куча.
Тиддеч посна республикыште ятыр вере корно шотыш кондалтеш да уэмдалтеш. Теве кызыт, мутлан, Йошкар-Олаште Ураев бульварыште да Петров уремыште у корно участке-влак ышталтыт.
А национальный проект-влакым илышыш шыҥдарымаште могай кугу паша-влак шукталтыт?! Республикым социально-экономически вияҥдыме индивидуальный программе дене келшышын мо гына огеш ышталт?!
Икманаш, Марий Эл вуйлатышын республикыште илыше калыкын, кундемнан илышыжым саемдышаш верч тыршымыже шижалтеш.
Любовь Камалетдинова.
