4 апрельыште Марий Эл Кугыжаныш Погынын депутатше-влак регионын транспорт да корно озанлык министрже Александр Герасименко дене вашлийыныт.
Депутат-влакын мутышт почеш, калыкым транспорт услугын качествыже, маршрут-шамычым вашталтылме, тӱшка транспортын социальный инфраструктур марте коштдымыжо да шуко моло йодыш тургыжландарат.
А.Герасименко регионыштына транспорт реформым илышыш пуртымо паша дене радамын палдарен. Мутшо почеш, таче кечылан комплексный транспорт схемым – муниципальный да муниципалитет-влак кокласе транспортын у маршрут вотшым – ыштыме. Кызыт эскерыдыме тарифан 7 у маршрут шотышто конкурсым увертарыме. Нуно, мутлан, Йошкар-Оласе автовокзал ден «Ветеран» садым, Медведево посёлко ден Семёновка селам, Туруново села ден Я.Крастынь уремым ушат. Тылеч посна республикын бюджетше гыч ойырымо 31,3 миллион теҥге кӱшеш эскерыме тарифан 7 у маршрутым почыт.
Министр тӱшка транспортым уэмдыме нергенат ойлен: 2021 ийыште 10 троллейбусым налме, 2023 ийыште – кокла классан 50 автобусым. 2024-2025 ийлаште автономно пашам ыштен кертше 5 троллейбусым налаш палемдыме. Эше 50 автобусым да тынарак троллейбусым налаш йодмашым ямдылен колтымо.
2021 ийыште перевозчик-шамычлан пассажирлан тӱшка транспорт дене кудалмыжлан наличный огыл йӧн дене тӱлаш правам пуаш обязанностьым пуртымо. Кызыт транспорт картым, Марий Эл Республикыште илышын картшым пуртымо, приложений гоч тӱлаш йӧным ыштыме, пассажир-шамычым шотлышо ешартыш датчикым, видеокамерым шындыме йодыш-влакым лончылат.
Йошкар-Олаште у автовокзал палемдыме жап деч ончыч пашам ышташ тӱҥалын. Кызыт тушечын кече еда 258 автобус 65 маршрут дене лектеш, кокла шот дене 2500 еҥ кушко-гынат кудалеш.
«Транспортым виктарымаш» увер системе дене «Транспортым виктарымаш» ГКУ пашам ышта. Тудо тӱшка транспортын корныжым, перевозчикын обязательствым шуктымыжым эскера, пашажым терга, пассажир-шамычын чотыштым шотыш налеш, водитель-влакын сигналыштлан вашешта, ДТП да корнышто лекше иктаж вашталтыш нерген увертара.
Транспорт реформым илышыш пуртымо годым тӧрсырат лийын: частный перевозчик-влак пассажир-шамычлан наличный огыл йӧн дене тӱлаш йӧным ышташ, «Транспортым виктарымаш» АИС-ыш ушнаш тореш лийыныт, тыгак нормативно-правовой акт-влакым судышто шӧраш тӧченыт. Таче кечылан АИС-ыш 30 гыч 25 перевозчик ушнен. Ӱмаште рейдым эртарыме годым палемдыме расписаний почеш кум кече почела рейсыш лектдыме икмыняр случайым рашемдыме да тиде амал дене маршрутым обслуживатлаш правам пуышо 18 свидетельствым поген налме.
Моло проблеме кокла гыч маршрут-влакын парышан огыл улмыштым да тидлан кӧра перевозчик-шамычын нунын деч кораҥмыштым але рейсым шагалемдымыштым палемдыман. Южо маршрутым кызытеш почаш огеш лий, молан манаш гын корно уке але тудым олмыкташ кӱлеш.
Вашлиймашын кокымшо ужашыштыже министр ден тудын алмаштышыже-влак депутат-шамычын йодышыштлан вашештеныт. Икмынярже дене газетым лудшо-влакымат палдарена:
- Йошкар-Олаште Некрасов ден Черняков уремласе корным олмыктымо да чоҥымо деч вара тӱшка транспорт 9В микрорайоным тичмашнек авалта;
- июнь мучаш гыч Дубки ден Ремзавод микрорайон-влакым 40П маршрут ушаш тӱҥалеш.
- перевозчик дене расписанийым шотыш кондымо да транспорт средствым вашталтыме шотышто совещанийым эртарыме деч вара Нолька посёлкышто илыше-влаклан маршрутым почыт;
- автономно кудалышт кертше 5 троллейбусым налме деч вара Ширяйково микрорайонышто илыше-влакын йодмашыштым шукташ йӧн лиеш;
- «Козьмодемьянск – Чебоксар – Йошкар-Ола» регион-влак кокласе рейсым шукемдыме йодыш дене Россий Федерацийын Транспорт министерствышкыже лекташ пунчалме.
Депутат-шамыч тыгак калыкым транспорт схеме дене палдараш, тидланже лӱмынак буклетым лукташ йодыныт, молан манаш гын илалше-влак чыланжат огыл кызытсе технологий дене пайдаланат. Тылеч посна водитель-шамычлан шкем кучымо шотым, пассажир-влакым шупшыктымо правил-шамычым шукташ кӱлмӧ, единый проездной билетым пуртымо, банк карте дене тӱлымӧ годым тарифым иземдыме нерген ойленыт. Корным олмыктымо, магистраль ден кугу корнывожлам электротул дене волгалтарыме, корно указательыш кок йылме дене возаш кӱлмӧ йодышламат ӧрдыжеш коден огытыл.
Вашлиймашым мучашлыме деч ончыч Кугыжаныш Погын председательын алмаштышыже Лариса Яковлева А.Герасименколан сай докладым ыштымыжлан, чыла йодышлан вашештымыжлан, тыгак пытартыш жапыште командыж дене моткоч кугу пашам шуктымыжлан депутат-влакын лӱмышт дене тауштен да Йошкар-Оласе автовокзалыште автобус-влакын пассажир-шамычым салоныш шындаш тӱҥалмыштым рушла да марла увертараш тӱҥалме нерген куанен палемден.
Маргарита ИВАНОВА
Фотом Марий Элын Кугыжаныш Погынжо деч налме
