Таче Ленин Комсомолым ыштымылан 106 ий темын.
Пайрем лӱмеш Йошкар-Олаште автопробег эртен. Тудын участникше-влак – Россий Федераций Коммунист партийын Марий регионысо пӧлкажын еҥже-шамыч – «Тулан ийласе комсомолец-влаклан» памятник воктеке пеледышым пыштеныт. Мероприятийыште кугурак тукымлан да кокла ийготан еҥ-влаклан сайын палыме комсомол муро-шамыч йоҥгеныт.
Татьяна Положенцева (Буркова), Марий Элысе КПРФ-ын Ремзавод кундемысе первичный организацийжын секретарьже (снимкыште):
– Ленин Комсомолым ыштыме кече – мыйынат пайремем: Совет Ушем жапыште шочынам, да мыйым Коммунист партий куштен. Шке жапыштыже октябрёнок, пионер, комсомолец лийынам. Ончыч отряд вуйлатышылан сайленыт, вара – комсорглан. Сайын тунемаш, мер пашаште чолган участвоватлаш, эллан пайдале айдеме лияш тыршенам. Тыге коммунист марте кушкынам.
Маргарита ИВАНОВА
Авторын фотожо/ «Марий Эл» увер агентстве
