Марий Элыште 2030 ий марте туризм отрасльым вияҥдыме концептуальный мастер-план ышталтеш.
Шукерте огыл тидын шотышто республикын правительствыштыже стратегический сессий эртен. Погынышо-влак ончылно Марий Эл правительстве председательын икымше алмаштышыже Дмитрий Троицкий выступатлен. Ойлымыж почеш, республик вуйлатыше Юрий Зайцевын кӱштымыж почеш турист толкыным кугемдаш виктаралтше проект-влак ышталтыт.
«Регион вуйлатышына ик гана веле огыл ойлен: мемнан республикыш уло эл да лишыл йот элла гыч уна-влак толын каяш кумылан улыт. Нунын чотышт кажне ийын кушкеш. Мастер-план кумдык-влакым вияҥдыме чыла тӱҥ аспект- влакым авалтышаш, тышке инфраструктурат, транспортат, турист-влакым вераҥдымаш, нунын каныме да моло условий пурат. Чыла тидыже республикым уна-шамычын кумылыштым налшым ышташ полшышаш», – каласен Дмитрий Троицкий.
Мастер-планым ыштыме икымше йыжыҥыште регионысо туризмын вияҥмын анализшым ыштат. Кокымшо йыжыҥыште приоритетный турист кластер-влакым лач ты сессийыште ойырен налыныт.
Кумшо йыжыҥыште турист кумдык-влакым вияҥдыме тӱҥ проект-влакым сайын мучаш марте ончен лектыт. Поснак муниципал образований-влакын ты шотышто перспективыштым шотыш налыт.
Мастер-планым «Стратеджи Партнеррс Группп» компаний ямдылен.
Шуктымо паша лектыш почеш турист кумдык, отрасльын приоритетный направленийже-влакым вияҥдыме, зонироватлыме, планироватлыме эскиз темлымашым чумырышо документым ямдылат.
Стратегический сессийыште туризм отрасль дене кылдалтше чыла министерстве, муниципал образований вуйлатыше, потенциальный инвестор да турсообшествын еҥже-шамыч лийыныт.
Марий Эл вуйлатышын администрацийыжын пресс-службыжын уверже негызеш Светлана Носова ямдылен.
Снимкыште:шукерте огыл Йошкар-Олаште у турист-увер бюро почылтын.
Авторын фотожо
