Марий Эл гыч латкум медицине пашаеҥан икымше бригаде Бердянскыш октябрь мучаште кайыш. Россий Федерацийыш угыч ушымо кумдыклаште пашам тыршен ыштыме деч вара землякна-шамыч кокла гыч икмынярынже мӧҥгӧ пӧртылыныт, икмынярынже кокымшо сроклан кодыныт.
Запорожский областьыште йоча-влакын тазалыкыштым тергаш ынде Медведево районысо рӱдӧ больнице да Козьмодемьянск район-влак кокласе эмлымвер гыч врач-педиатр-шамыч, Звенигово районысо рӱдӧ больнице гыч врач-офтальмолог, Йоча республиканский клинический больнице гыч хирург ден психолог, Республиканский психоневрологический диспансер гыч йоча психиатр каеныт (снимкыште).
– Бригадыштына кугу опытан специалист-влак улыт. Профосмотр мыланна – кече еда шуктымо паша, сандене тудым кузе эртарышашым пеш сайын палена, – манеш Медведево районысо рӱдӧ больницын педиатрже Наталья Кострова. – Лишыл еҥна-влак тыгай ошкылнам умылат, вет ме ковидный стационарыштат, пожарыштат, моло неле ситуацийыштат уже ыштенна, сандене тиде пашаланат ямде улына.
– Бердянскыште пашам ыштыше коллегына-шамыч шкеныштым сай велым ончыктеныт. Нуно кечыште шӱдӧ утла икшывын тазалыкшым тергеныт. Кокымшо бригадынат шке задачыжым кӱлынак шукта манын ӱшанем, – палемда Тазалык аралтыш министерствын ава ден йочам аралыме пӧлкажын начальникше Галина Мурзаева.
– Запорожский областьыште илыше йоча-шамычлан полшаш кумылым ончыктымыланда тауштем, – кужу корныш тарваныше медик-шамычлан ойлен тазалык аралтыш министрын алмаштышыже Татьяна Бастракова. – Таза лийза, пашам кӱлын шуктыза. Ме тендам мӧҥгеш вучена, молан манаш гын те тыштат моткоч кӱлыда. Кылым огына йомдаре – мемнан деке тургыжландарыше чыла йодышда дене лекса.
М.ИВАНОВА
Фотом Марий Элын Тазалык аралтыш министерствыжын сайтше гыч налме
