Светлана Пехметова
Театрын тӱнямбал кечынже мыскараче Вера Горохован шкешотан театржым ончышна.
Программыжым «Йоча жапыш билет» манын лӱмден. Ме чынже денак ик жаплан кодшо курымын 90-ше ийласе йоча, самырык пагытыш пӧртылна. Залыште шинчыше ятыр еҥже, очыни, йочасадышке коштынжат огыл, вет ончыч яллаште икшыве-влак дене тӱҥ шотышто кова-шамыч шинченыт. Туге гынат сценыште мом ышталтмым раш умылаш лийын – сценарий йоча койышым, ньога-влакын мутланымыштым, изи ден кугу кокласе кылым почын пуэн, а варажым – школ, самырык пагыт, ялысе клуб, дискотеке гыч сцене-влак…
Тыгай концертыште эре иктылан ӧрам – сценыш мыскарам ончыкташ лекше-влак кузе тыге чыла шарнен кодыт? Адакше Веран ик эн ойыртемалтше «фишкыже» тиде – залыш волен, ончаш толшо-влакым шке сценарийышкыже пуртен модеш. А вет тыгай годым вучыдымо сӱрет лийын кертеш, сандене кеч-можымат лачым да пеш писын шонен шуктыман. Кузе?
– Мый сценыш лектамат – рольым ом мод, мый тушто «илем», – вашештыш Вера.
Сценарийым тудлан ты ганат пӱтынек журналист да мурызо Владимир Матвеев возен. А концерт программыжым ончычсо семынак Советский район Кужмарий кундем гыч Вера Мочаева ден Валентина Ефремова, да тыгак М.Шкетан лӱмеш Марий национальный драме театрын актержо Алексей Тетерин, Волжский район гыч Алевтина Чернова моткочак мастарын келыштараш полшеныт.
Марий Эл тӱвыран сулло пашаеҥже Эльвира Трифонова, Волжский район гыч Россий Федераций тӱвыран сулло пашаеҥже Тамара Яранцева ден Марий Эл тӱвыра сулло пашаеҥже Лариса Петрова, А Володя Матвеев ден Ирина Якаеван йоҥгалтарыме «Дискотекыш вашкем» ден «Мура магнитофон», «Шуматкече» ансамбльын солистше-влак Елена Григорьева ден Игорь Борисовын «Вис-вис» ден «Угыч вашлиймаш» мурышт дене уло калыкын чонжым кӱлткаш таратеныт.
Программым ямдылыше-влак кажне гана вес артист-влакым кычалыт.
– Ий гыч ийыш тидым ышташ нелырак, молан манаш гын марий эстрадыште тиде жанр дене пашам ыштышыже шагалемыныт, – манеш Вера Горохова. – Шке жапыштыже мыланем, тыгак Вера ден Валентиналан лӱмлӧ землякна, Россий Федерацийын сулло артистше Виктор Бурлаков кугу шӱкалтышым ыштен.
Чынак, республикыштына тыгай примержым тетла ойырен каласашат уке.
Самырык-влакат куандарышт: Александр Коновалов ден Александр Леонтьев гитарым шоктен мурышт гын, Кирилл Новоселов – гармонь дене. Такше, мутлан, Кирилл эше мыскара жанрыштат шкенжым ала терген онча ыле? А мо, тудо вет артист-комик, МАССР-ын калык артистше Илья Россыгинын шочмо ялже гычак. Моло кундемла гычат мыскараче-влакым утларак ужмо шуэш.
А кызытеш тидын шотышто «советский-шамыч» ончылно улыт, Вера Гороховат, Вера Мочаева ден Валентина Ефремоват концертыштым Йошкар-Олаште кок сеанс дене аншлаг дене эртарат.
Валерий Поликарповын фотожо
