Марий Элысе книгагудо-влак «Библиойӱд-2026» Российысе акцийыш ушнаш ямдылалтыт. Тений тудо «Калык-влакын икоян улмаште – Российын вийже» теме дене лиеш.
18 апрельыште, шуматкечын, Республикысе С.Г.Чавайн лӱмеш национальный библиотекын 18:00 гыч 22:00 шагат марте эртараш палемдыме икмыняр паша радамже дене палдарен улына ыле. Кызыт эше ешарен каласена.
Тыште тыгак Россий Банкын Марий Эл Республикысе Национальный банкшын пӧлкажын тематикан площадкыже, поро пашам шуктышо «Кугу шӱман изи йолташ-влак» фондын тематикан площадкыже ышташ тӱҥалыт; «Мастар-влакын олашт» мастаргудо-ярмиҥга эртаралтеш, тематикан фотозоно-влак лийыт, сем площадкыште «Щас муралтем!» караокеш ушнаш йӧн уло, «Раритет-влак» салонышто «Илен улмаш маска…» палдарыше да модаш таратыше программе, «АртЛитера» сылнымут-сылнысем салон вучат.
Республикысе Йоча ден самырык-влаклан В.Х.Колумб лӱмеш библиотекыште 17 апрельыште, кугарнян, 17:00 гыч 21:00 шагат марте «Колумб библиотекыште библиорӱмбалге» тӱшка лӱм дене мероприятий-влак эртат.
Республикысе Сокыр-влаклан библиотек 17 апрельыште кечыгут уна-влакым вашлиеш да «Калык шуко – эл икте» книга ончер дене палдара, руш, марий да татар калык вургемла дене фотосессийым эртара, Российысе калык-влакын кочкыш-йӱышыштым ончыкта.
Республикысе Рӱдӧ йоча библиотек 18 апрельыште 15:00 гыч 18:00 шагат марте унаже-влакым вуча. Нунышт «Матрёшкын кудывечыже» площадкыште Российысе калык-влакын сынышт дене пу матрёшко-влакым чиялтен кертыт, «Руш йылмым палыше-влак» йылме квизыште нейровот полшымо дене книга ком-влакым ыштен, тӱрлӧ тарванылман да ӱстембалнысе модмашыш ушнен сеҥат. Тылеч посна икмыняр мастар класс лиеш, модын колтыдымо лотерей модмаш эртаралтеш.
