Тений Россий Федераций Социальный фондын Марий Элысе пӧлкаже 24,5 миллион утла теҥгеаш 16 кугыжаныш контрактым ыштен да регионыштына илыше 600 федеральный льготниклан санаторий-курорт шотан тӧнежлаште каналташ да эмлалташ путёвкым яра ойырен.
Ты гана льготник-шамычлан «Кичиер», «Сосновый бор», «Кооператор», «Ваштар курык» санаторийлаште веле огыл, республик деч ӧрдыжтат – Крымыште да Краснодар крайыште – тазалыкым пеҥгыдемдаш йӧным ыштыме. Санаторийын профильжым эмлыше врач пациентын черже-шамычым шотыш налын ойыра. Эмлалтме курс – 18 кече, инвалидностян йочалан – 21 кече, а лувем да вуйдорык чер дене орланышылан – 24 гыч 42 кече марте.
Путёвко социальный услуго наборым натуральный вид дене налше федеральный льготник-влаклан ойыралтеш. Йодмашым Кугыжаныш услуго порталыште, МФЦ-ыште, тыгак РФ Социальный фондын Марий Элысе пӧлкажын клиент службылаштыже пуаш лиеш. Черетыш йодмашым пуымо кече гыч шогалтат. Тушто куштырак улмым РФ Социальный фондын сайтыштыже – Марий Элысе пӧлкан лаштыкыштыже – рашемдаш лиеш.
I группо инвалидностян граждан ден инвалидностян йоча-влак санаторий-курорт шотан тӧнежлаште, каныме да эмлалтме верыш ола воктенысе кӱртньыгорно транспорт, тыгак ола-влак кокласе транспорт дене миен толмо корнышто кондыштарыше ик еҥлан кокымшо путёвкым яра налаш праван улыт.
Ушештарена, федеральный льготниклан инвалидностян йоча ден кугыеҥ, Кугу Отечественный сарын участникше, ветеранже да инвалидше, Кугу Отечественный сар кайыме ийлаште военный службым эртыше да военный объектлаште пашам ыштыше-влак, боевой действий-шамычын, ты шотыштак СВО-н, ветеранышт, Кугу Отечественный сарын колышо инвалидше да боевой действийлаште вуйым пыштыше участник-влакын ешышт, блокадный Ленинградыште да авырен налме Севастопольышто илыше, радиаций логалмылан кӧра тазалыкым йомдарыше граждан-шамыч шотлалтыт.
Социальный услуго набор дене пайдаланыме, санаторий-курорт шотан тӧнежлашке путёвкым налме йодышым Россий Федераций Социальный фондын Марий Элысе пӧлкажын 8-800-200-11-70 номеран телефонжо дене рашемдаш лиеш.
М.ИВАНОВА
М.Иванован фотожо/ «Марий Эл» увер агентстве
