МАРИЙ ЙӰЛА МЕР ИЛЫШ ДА ЙӰЛА УВЕР ЙОГЫН

Келшымаш чоным ырыкта, кумылым ылыжта

Мер илыш

Келшымаш чоным ырыкта, кумылым ылыжта

20 мартыште йӱд ден кече иктӧр улмо кечын Шернур ден Марий Турек районласе марий мер актив – Мер Каҥаш ден Марий юмыйӱлан районласе общинын чолга еҥышт – Кукнур кундемыште вашлийыныт. Ты поро йӱлам кокымшо ий Мер Каҥаш ден Йошкар-Оласе Кукнур землячестве шукташ полша.

Пошкудо район гыч толшо-влакым писатель да просветитель, Пеледыш пайремын «кресачаже» А.Ф.Конаковлан Кукнур кыдалаш школ ончылно шогалтыме бюст воктеке пеледыш аршашым пыштеныт. Тӱҥ мероприятий верысе тӱвыра да каныме пӧртыштӧ лийын. Кок пошкудо район дене кылым пеҥгыдемдыме шот дене «Киндым вашталтымаш» марий йӱлам шуктымо. Марий Турек вел-шамыч шке кинде чесышт – мелна кышыл, салмамуно, туара, шоҥешталтше пура дене толыныт  гын, Шернур вел-шамычат ты шот-ратымак шуктеныт. Кажныж велым кум онаеҥ дене шогалын, Шернур район «Марий кумалтыш» общиным вуйлатыше В.Мамаев киндым пелештыш, вашешыже Марий Турек районысо «Ошмарий-Чимарий» общинын тӱҥ онаеҥже Г.Ивановын пелештымекыже, чыланат чесым авызлышт. Вячеслав Михайловичын кажне мутшо, варажым сцене гыч марий юмыйӱлана, общинын пашаж нерген ойлымыжо тунар чоныш логале, волгыдо ӱшаным, пагалымашым, кугешнымашым лукто!

Вашлиймаш икте-весын мер паша кузе шукталтмым рашемдаш полшыш. Кукнур ял шотан илем ден администрацийжым вуйлатыше-влак Л.Алмаматова ден Л.Долгушевын саламлыме да ыштен шогымо сомыл нерген ойлымышт деч вара Шернур районысо Мер Каҥаш вуйлатыше И.Кошкинан отчетшым колыштмо. Мер Каҥаш лӱм дене оналмаш В.Мочаев ойлен.

Марий Турек мер паша нергенат шернур-влаклан палаш оҥай ыле. Тидын нерген Онаеҥ Г.Иванов, краевед В.Сорокина, «Саскавий» марий ӱдырамаш ушемын еҥже С.Конышева, Карлыган ял шотан илемым вуйлатыше, ялозанлыкыште тыршыше Ф.Прохоров кумдан каласкаленыт. А «Арбор вел» фольклор ансамбль сылне мурышт дене кумылым налыныт.

Пошкудо-влак Йӱштӧ Кугызан илемышкыжат кинде (мелна кышыл, когыльо, эсогыл палыш) денак миеныт. Нуным Йӱштӧ Кугыза шкежак да верысе тӱвыра да каныме пӧрт пеленысе «Пеледыш» ансамбльын чолга ӱдырамашыже-влак мелна кышыл, муро сем дене вашлийыныт. Йомак корным эртыме деч вара Йӱштӧ Кугызан илемыштыже погымо ӱстел чесым авзлаш тӱҥалме деч ончыч В.Мамаев ден Г.Иванов калык ден калык, йӱла ден йӱла коклаште ваш келшымаш нерген ушештареныт, элнам пытараш шонышо-влакын шыдышт йӱкшен йомжо, ачамландынан чапшым арален шогышо-влаклан аралтыш лийже манын, юмым пелештеныт.

Мер паша – чон йодмо паша. Эсогыл Йӱштӧ Кугызан йомак илемжат тыгак негызым налын. Шке кундемым тӱзатыме, калыкым, йылмым йӱлам арален кодымо сомылым шуктышо-влакын чонышт ӱстел чес гаяк поян, уш-акылышт эр кече гаяк волгыдо, кумылышт порсын шӱртӧ гаяк вичкыж. Чыла тидыжым Шернур ден Марий Турек районым вуйлатыше-влак ужын да шижын моштат, сандене мер калык дене пырля улыт. Шокшо салам мутышт ден тыланымашыштым Шернур район администрацийым вуйлатышын социальный йодыш дене алмаштышыже А.Ямбулатова ден Марий Турек район администрацийым вуйлатышын экономике йодыш дене вуйлатышыже Л.Ложкина ойленыт.

Тек кумдан Сандалыкыштына эреак икте-весым умылымаш лиеш, пошкудо ден пошкудо, ял ден ял, эл ден эл келшымаш кокласе кыл пеҥгыдемеш.

Светлана Пехметова,

Йошкар-Оласе Кукнур землячествым вуйлатыше

Авторын фотожо.

Опубликовать в Одноклассники

Добавить комментарий