Марий кечышот почеш:
14 сентябрь – Кайыквусо илян. Вӱд йӱкшымӧ кече. Семон кече.
15 сенябрь – Шыже кумалтыш почылтеш.
Марий йӱлан чинче тушыжо:
«О, поро Ош Кугу Юмо! Ончыкыжымат тылат ме кызытсе гаяк тауштен кумалаш тӱҥалына. Кугу кугача ден кугуава-влакын ойыштым шуктен, нунын семынак пырля ваш келшен, кинде-шинчал да моло сий дене тыйым сийлена. Илышнам виктаре, поро Кугу Юмо. Кавыл ыште!»
«О, поро Ош Кугу Юмо. Ме лышташ йымалне илыше игет гына улына. Шот дене ыштен кученат, илышым тӧрленат огына мошто. Тыйын пӱрымет дене веле илыш сын-кунным кучаш тӧчена. Ончыч каласышашым шеҥгеч каласышна, шеҥгеч каласышашым ончыч каласен колтышна, вуеш ит нал, Ош поро Кугу Юмо!»
«Юзо ой» брошюр гыч налме, 1991 ий.
Черке йӱла почеш:
13 сентябрь – Юмын Аван ӱштыжым Константинопольысо Влахернский храмыш пыштыме кече.
14 сентябрь – Черке У ий тӱҥалтыш.
15 сентябрь – Преподобный Антоний ден Феодосий Печерскиймытын кечышт.
Орланыше Иоанн Воинлан вор деч аралаш да шолыштмым пӧртылташ лудмо молитва:
«О, Христос верч кугу орлыкым чытыше Иоанн! Чын ӱшаныше-влак верч пеҥгыдын шогышо, тушман-влакым поктен колтышо, шыгыремдыме-влакым аралыше! Ойго да эҥгек деч утлышаш верч сӧрвалымынам колышт, вет тыланет ойганыше-влакым лыпландараш, кертдыме-влаклан полшаш, титакдымым арамеш колымаш деч утараш, чот орланыше-влак верч чыла осалым сеҥышаш верч кумалаш Юмо деч куат пуалтын. Мыланна шинчалан койшо але койдымо тушман ваштареш кучедалаш полшышо лий, тек Тыйын полшыметлан, аралыметлан кӧра мемнан ваштареш шогышо осаллан намыс лиеш. Святой Троицыште моктымо Господь Юмына деч сӧрвален йод, тек языкан да йӧрдымӧ кул-влак Тудын деч каласен моштыдымо порылыкым налыт, кудым йӧратыше-влаклан ямдылен, кызытат, керек-кунамат, курым-курым мучкак. Аминь».
«Марла молитва-влак» книга гыч налме,2005 ий
Шарнаш кодшо ой:
Сын дене мландым огыт курал.
Таҥ – таҥын воштончышыжо.
Тегыт воктене мӱят пушаҥеш.
Тичмаш еш тичаш киндерке дене иктак.
Тошкымо корнеш шудо ок куш.
Ужаванат шке мурыжо уло.
Ужшаш пиал омсам кырен пура.
Уло – пешак ит йывырте, уке – пешак ит ойгыро.
А.Е.Китиковын «Марий калыкмут мутер» книгаж гыч налме,1990 ий.
Ӱмырым илен эртарышын каҥашыже:
«Кыралтше еҥ кугурак сеҥымашке шуэш.
Пуд шинчалым кочшо мӱйым утларак акла,
Шинчавӱдым йоктарыше утларак веселан воштылеш,
Кӧ колен, илышым утларак акла.» Омар Хаям.
С.Носова ямдылен
Снимкыште: Йошкар-Ола – кумылым налше ола.
Авторын фотожо
