Марий йӱла почеш:
16 – Тичмаш тылзе
Кугече арня
17.04 – Шӧртньӧ (Воштыр) рушарня. Кичке кече. Осал шӱлышым (воштыр дене) поктымо кече.
Кумалтышын чинче тушыжо:
«А, Кугу Чодыра перке юмо, йӧратен лийын шого мемнан пелештымынам. Ик ой-каҥаш дене Мланде Кугу Юмо, Мландава, пелештен шогымына алал лийже, серлаген шого. Кум тӱрлӧ иман пушеҥгет уло, кум тӱрлӧ лышташан пушеҥгет уло, чодыра емыжет уло. Емыж-саскат дене куандарен шогет, лаштыра виян вожан тӱшка пӱкшермет уло. Чодыра тичмашет дене йывыртыктен шогет, серлаген шогет, алал лийже. Чодыра кӧргӧ писе шордет уло, патыр маскат уло, писе пирет уло, чоя рывыжет уло, писе мераҥет уло. А, теве теле кечын илен лекташетат серлаген шого. А, теве шошо кече толеш, чыла янлыкшымат серлаген шого. Шордетын презыжат лиеш, маскатын игыжат лиеш, тӱрлӧ янлыкын шке игыштым арален шогаш, серлаген шогаш йодын пелештена. Тӱрлӧ тӱсан кайыкетат уло, ушан тумнатат уло, мурызо кукуэтат уло, писе йӱкан шӱшпыкетат уло, чыла кайыкланат, муныштым иктеш мунчен, игыштым ашнен кушташ серлаген шого. Чодыра виетымат осал тӱтан мардеж деч, осал тулойып деч, шукш-копшаҥге деч арален, серлаген шого. Тӱрло янлыкетым, тӱрлӧ кайыкетым озыркан мардеж деч, осал кӱдырчӧ, волгенче, шолем деч, осал чер деч аралтышым, серлагышым ыште. Алал лийже!»
«Ош Сандалык ончылно» книга гыч налме. Йошкар-Ола,2012 ий.
Черке йӱла почеш:
17 – Господь Иисус Христосын Иерусалим олаш Чапландаралт пурымыжо. Шертне пазар.
Калык пале почеш:
Шертне рушарнян ты пушеҥгын укшыжо капышкет логалеш гын, шинчавочмо деч эрнаш лиеш маныт.
Освятитлаш нангайышаш шертне укшым таза да самырык пушеҥге гыч гына тодылман. Шӱгарла воктене шогышым тӱкаш огеш кӱл.
Черке гыч кондымо шертне укшым черланыше-влакын кийыме вакшышышт воктеке вераҥдыман.
Освятитлыме шертне укшым черке сорта гаяк луктын кудалташ огеш лий, идалык эртымеке йӱлалташ кӱлеш.
Азам ыштен кертдыме ӱдырамашлан ты кечын шертне укшым шкаланжак тодыл налман, черкыш каен освятитлыман да шке пӧлемышкыже вераҥдыман. Полша маныт.
Ты кечын шертне кичкым кочкат гын, шонымет шукталтеш, маныт.
Мландыш кералме шертне укш тений шыжым сай лектышым кондаш полшышаш.
Освятитлыме шертне укш дене вольыкым ласканрак лупшен налаш гын, огыт черлане.
Шарнаш кодшо ой:
Калыкетым ават гай йӧрате, ачат гай арале.
Калыкмут – пунчал мут.
Калык шинчавӱд арам огеш його.
Калык ойго – кугу теҥыз, ик еҥ ойго – изи толкын.
Калыкын кӧ улмыжым шинчымет шуэш гын, илышыжым ончал, йылмыжым тунем.
А.Е.Кититковын «Марий калыкмут мутер» книгаж гыч налме.
С.Носова ямдылен
