Марий кумалтышын чинче тушыжо:
«Нур ото гай атыланен, нур куэла ошемын, нур куэла йолваланен, икияш воштырла ӱмырым шуэн, кӱ курыкла куанен, курык ӱмбал саскала пеледын, эр ӱжарала волгалтын, эр кечыла нӧлталтын, кечывал кечыла шарлен илаш ий гыч ийыш йодына. Модын-воштыл илен, ӱмыр эртараш поро жапым пуэн, пӱрен шого. Кумалтышнам ӱлыл тӱтыра кӱш кӱзыктыжӧ, кӱшыл тӱтыра ӱлыкӧ волтыжо…»
В.Т.Михайловын «Калык ойпого – калык чон поянлык» книга гыч налме, 2017 ий.
Черке йӱла почеш:
18 февраль – Черниговысо святитель Феодосийын кечыже; Юмын Аван «Илышыште йомшо еҥым чын корныш лукшо» («Взыскание погибших») юмоҥажын кечыже.
22 февраль – Иркутскысо святитель Иннокентий ден Москван да уло Российын патриархше святитель Тихонын кечышт.
23 февраль – Священномученик Харалампийын кечыже.
Йоча-влак верч Утарыше Христослан аван кокымшо молитваж гыч:
«Мланде ӱмбалне чыла тӱрлылан илышым пуышо, чылалан поро деч порым ыштыше, мыланем ешын аваже лияш пӱренат; Тыйын порылыкет мыланем йочам пуэн, садлан мый тыге каласаш тоштам: нуно Тыйын йочат улыт. Тый нунылан илышым пӧлекленат, колыдымо чоным пуэнат. Тыйын кӱштымет почеш илаш тынеш пуртенат, эргылыкеш налынат да Шке Черкетын илыш кӧргышкыжӧ пуртенат. Ӱмырышт мучко сай илышым пуэн шого, Тыйын Кӱштыметым шуктен шогаш йӧршым ыште, Шкендын чынет дене волгалтаре, да Тыйын Святой лӱмет нунын кӧргыштыштат, нунын гочат волгалт шогыжо!»
«Марла молитва-влак» книга гыч налме, 2005 ий.
Калык пале:
Леве февраль йӱштӧ шошым да шуко кылмым конда.
Февраль мучаш мыняр йӱштӧ лиеш – шошын икымше тылзыже тунар левырак лиеш.
Февральыште йӱштӧ шуко шога – теле вашке пыта.
Лум пушеҥге укшлаш пижеш – леве толеш.
Февраль йӱштӧ – кеҥеж шокшо лиеш.
Ӱмырым илен эртарышын каҥашыже:
Айдемым илыш ок туго гын, тудо пӱрымашыж деч виян.
Еҥ-влак тыланет полшаш тореш лийыт гын, Эйнштейнын ойжым шарналте: «Кӧ мыланем полшен огыл, мый чыланыштлан тауштем: лач нунылан верч чылажат илышыште шке ыштенам».
Малымет шуэш гынат, кажне кечын куд шагат эрдене кынелат гын, кеч могай шонымашке шуат.
Лаштыкым Светлана Носова ямдылен
Снимкыште: Советский район Ӱшнӱр селасе святой апостол-влак Петр ден Павелын храмышт. 1814 ийыште чоҥаш тӱҥалме, 1816 ийыште мучашлыме. 1812 ийыште мучашлалтше Отечественный сарыште сеҥымылан кӧра тудым Наполеоным Сеҥымаш шарныктыш радамыш пуртымо. Тиде ийлаште Приходын шӱгарлаже, Тапшер ялыште школжо лийыныт. Совет жапыште храмым 1939 ийыште петыреныт.
2010 ийыште угыч приходым регистрироватленыт. 2014 ийыште Наполеоным сеҥымылан 400 ий теме вашеш историй да тӱвыра памятник семын черкым олмыкташ манын, «Российын тӱвыраже» федеральный целевой программыш пуртен кертме. Республикыште тыгай черкыже икте гына. Олмыктымо пашам Моско, Озаҥ, Чебоксар гыч специалист-влак шуктеныт. Варажым черкыш пураш кугорно деч сай корным ыштеныт, 2017 ийыште электротулым, а 2020 ийыште газым шупшыныт.
Кызыт храмыште шокшо да волгыдо. Но кӧргыштыжӧ олмыктымо паша эше шуйна. Рушарня да кугу пайрем еда храмыште службым эртарат, а тыглай кечын тушко 10 гыч 12 шагат марте логалаш лиеш.
Светлана Носован фотожо.
