12 февраль – тичмаш тылзе, Коҥга пазар (Кужэҥер район).
Марий кумалтышын чинче тушыжо:
Мер Юмылан пелештыме мут гыч:
«Мер Юмо! Мемнан элнам, кугыжанышым вуйлатыше-влак ушан-акылан лийышт, шӱм-чоныштым калык велке савырен, ончыкыжымат илышнам куштылемден, тыныс илыш лийже манын, сӧй-согыш ынже лий манын, тушман, сӧй курал ваштареш пеҥгыдын кучедалышт. Шканыштат, ешыштланат ончыкыжо тазалыкым пуэн шого. Кугыжанышлан окса казнажлан перкем пуэн шого, калыклан кугурак пашадарым, шоҥго-влаклн пенсийым кугемдаш, илышнам саемдаш ыҥгайым ыште.
Калыкна кугыжанышлан полшен, элнам арален илыже манын йодына.
Поро Ош Кугу Юмо, мемнан кумалмынам кавыл ыштет манын ӱшанен кодына».
«Марий сугынь» книга гыч налме, 2005 ий.
Черке йӱла почеш:
3 февраль – Юмын Аван «Куандарыше» («Отрада или Утешение») юмоҥажын кечыже.
6 февраль – Петербургысо поро пиалан Ксения аванан кечыже.
7 февраль – Российысе новомученик ден исповедник-влакын погынышт.
9 февраль – Святитель Иоанн Златоустын кечыже.
Йоча-влак верч Утарышылан молитва гыч:
«Господь Иисус Христос, йочамым (лӱм) чамане да утаре. Тудым чоҥештылше пуля, шикш, кӱзӧ, керде, аяр, тул, вӱд налмаш, колымашым кондышо шӱйшӧ лӱмӧ, атомын пӱсӧ йолжо да вучыдымо колымаш деч Шке Святой леведышет йымалне арале.
Господь, ужмо да уждымо деч, тӱрлӧ эҥгек, шыде да ойго деч утаре. Господь, тӱрлӧ чер деч тудым паремде, тӱрлӧ йырнык деч эрыкте да шӱм-чон йӧсыжым да ойгыжым куштылемде.
Господь, Святой шӱлышетын порыжым кужу илыме курымжылан да тазалыкшылан шкенжым яндарын кучаш ситышынак пу…»
«Марла молитва-влак» книга гыч налме (2005 ий).
Ӱмырым илен эртарышын каҥашыже:
«Илышыште мӧҥгеш кум умылымаш нигунам огеш пӧртыл: жап, мут, йӧн.
Кум шижмашым нигунам йомдарыман огыл: ласкалыкым, ӱшным да чапым.
Кум шижмаш илышыште эн шерге: йӧратымаш, лач тыге лийшаш манме шонымаш да ӱшан.
Кум шижмашлан ӱшан уке: властьлан, пиаллан да поянлыклан.
Кум койыш-шоктыш айдемым палдара: паша, эре чын ыштыме да сеҥымаш.
Кум койыш айдемым лунчыктара: арака, кугешнымаш, шыдылык.
Кум чон шижмашым луктын каласаш эн неле: «Мый тыйым йӧратем», «Проститле мыйым», «Мыланем полшо».
«Тыйын велке каласыме ик шомакат шке нергенет шонымашым вашталтышаш огыл».
«Чыла кертат, а мом от керт – тудлан утларак жап гына кӱлеш».
Лаштыкым Светлана Носова ямдылен
Снимкыште: Йошкар-Олаште – Благовещений башне. Изи Какшан эҥер гоч ыштыме Театральный кӱвар деч тораште огыл, Благовещенский собор ваштареш Москосо Йошкар площадьысе гай Спасский башне уло. Тудо оригинал деч изирак да ош кермыч дене ыштыме сӧрастарыш деч посна. Башне вуйыш кок вуян арсллан кайыкым, фасадлашкыже кремльын курантше сынан циферблатым келыштарыме. Кажне шагатыште динамик гыч кырыме йӱк шокта. Но башньым Спасский огыл, а Благовещенский манын лӱмденыт.
Светлана Носован фотожо.
