Марий кумалтышын чинче тушыжо:
«Кече Юмо, тый мыланна шуко пӧлекым пӧлекленат, пӧртылтымынам от вучо. Меат тыршена налаш кӱч кутышым гына, утыжо Ош Кугу Юмылан кодшо, кӧн уке, тудлан лийже».
«Кава Юмо, Тый Мланде йыр погыненат, мемнам, илыме радамнам, илыме арым пеҥгыдын, тӱткын эскерет, сай поро пашанамат, илышынамат, сай да уда пашанамат ужат… Амырчык койышна верч, Кава Юмо, ӧпкелен, ойганен, кӱшкӧ кӱзен кайышыч. Вараш кодын умылышна, мыланна ваш-ваш пагалымаш, келшымаш кӱлыт, шурным, сурт-пече ӱзгарым, вургемым, тӱрлӧ кочкыш перкем кучаш кӱлеш, пӱртӱсым йӧратен илаш, вӱдым, южым, мландым аралаш тыршыман. Йоҥылыш пашанам тӧрлаташ, Ош Кугу Юмо, Юмын йӱлажым илышыш пурташ мутым пуэна».
«Марий сугынь» книга гыч налме, 2005 ий.
Черке йӱла почеш:
26 ноябрь – Святитель Иоанн Златоустын кечыже. Златоуст кечын чыла пасу пуста, ойленыт.
27 ноябрь – Апостол Филиппын кечыже. Ты кечын пӧрж налеш, шӱльӧ сайын шочеш, а йӱр йӱреш — шыдаҥ сайын шочеш, ойленыт.
28 ноябрь – Преподобный Паисий Величковскийын кечыже. Гурийын кечыже. Ты кечын лум возеш гын, шошымсо вӱдшор марте тудо кия; Иисус Христос Шочмо лӱмеш пӱтӧ тӱҥалтыш.
29 ноябрь – Апостол да евангелист Матфейын кечыже.
30 ноябрь – Преподобный Никон Радонежскийын кечыже. Телым ончыктышо Григорийын кечыже. У лум ӱмбач изижге, кугужге орва семын пӧрдалыныт, кечым чапландареныт.
Москосо блаженная Матроналан молитва:
«О, поро пиалан Матрона авана. Чонет дене Юмын престолжо ончылно Пылпомышто шогет, капетше дене мландыште канет да тыланет кӱшычын пуымо порылык дене тӱрлӧ ӧрыктарыше пашам ыштет. Ончал кызыт поро шинчат дене сулыкан, ойган, черле да кечына-влакым языкан алгаштарыше илен эртарыше-шамыч ӱмбаке, лыпландаре мемнам, ӱшаным йомдарыше-влакым, чоннам эрыкташ языкна верч юмын колтымо пеш неле чыла черым паремде, утаре мемнан Господьнам, Иисус Христосым, закондымо пашанам, сулыкнам, рвезе годсо гыч тачысе кече марте, шагат йотке ыштыме языкнам кудалташ йод, да тыйын сӧрвалымет дене поро вийым да чон куаным налын, Троицыште улшо Ик Юмым – Ачам, Эргым да Святой шӱлышым – моктен мурена, кызытат, керек-кунамат, курым-курым мучкак. Аминь»,
«Марла молитва-влак» книга гыч налме, 2005 ий.
Шарнаш кодшо ой:
Могай сийже — тугаяк таужо.
Тумо чара гын веле, ажгынаш огеш лӱд теле.
Темше шужышылан ок ӱшане.
Шкет кочмо годым киндат тамлын ок чуч.
Вате-марий сырымаш — порсын солык кошкымеш.
Сурт сондык огыл, нумал огыт кае.
Кӧ йомдара – шӱдӧ сулыкан, кӧ шолыштеш – ик сулыкан.
Сӧснам пӧртыш ит пурто.
Сӱаныште теммеш от коч гын, нужна лият.
А.Е.Китиковын «Калыкмут» книгаж гыч налме, 1991 ий.
Ӱмырым илен эртарышын каҥашыже:
«Кӧ тендан йолчиемым чиен ончен огыл, тудын шнурокшым кузе кылдышашым туныктышаш огыл». .
«Ончыч шонымашетым шотыш кондо, тунам тӱнямат вес шинча дене ончалат».
Светлана Носова ямдылен
Снимкыште: Йошкар-Оласе ик уремыште теве тыгай сӱретымат ужаш лиеш.
Авторын фотожо
