Марий кечышот почеш:
21 сентябрь – Вольык илян.
22 сентябрь – Тӱня Юмын кечысавыртышыже – кече ден йӱд ик кужытан.
Марий йӱлан чинче тушыжо:
«О, поро Ош Кугу Юмо! Поро шонымашнам луктын ойлышна, кушко гына огына кай, кушто гына огына лий, Тый денет пырля улына. Тичмаш киндым шулмо годымат, тичмаш кочкышым тамлыме годымат Тыйын лӱметым налына. Сай илышым, тазалыкым, кужу ӱмырым пӱрӧ!»
«О, поро Ош Кугу Юмо! Ушан еҥ дене кутыраш ушым ешаре, чоя дене кутыраш важмалдык шомакым пу. Поро ден осалым ойыркален мошташ шотым пу. Родо-тукым, пошкудо-влак дене ӱстел йыр шинчын, пырля кочкаш-йӱаш пӱрӧ. Еҥ ден еҥ, калык ден калык, кугыжа ден кугыжа кокласе илышым эменландаре. Поро шӱлыш порылыкым кондыкто, лыжга мут кумылым нӧлталже, томам ой шӱмеш логалже. Кайык еш гай икте-весым йӧратен, вараксим гай вычыматен илаш йӧным пу, илыш вийым сакле!»
«Юзо ой» брошюр гыч налме, 1991 ий.
Черке йӱла почеш:
17 сентябрь – Белгородысо святитель Иоасафын кечыже; Юмын Аван «Йӱлен пытыдыме вондер» («Неопалимая Купина») юмоҥажын кечыже. Воронежысе святой-влакын соборышт.
19 сентябрь – Марий кундемысе новомученик-влакым шарныме кече. Ежовысо монастырьын пайремже.
21 сентябрь – Юмым Шочыктышо да эреак ӱдыр улшо Эн Святой Владычицын Шочмыжо.
22 сентябрь – Преподобный Иосиф Волоцкийын да святитель Феодосий Черниговскийын кечышт.
Марий мландысе священномученник епискеп Леонидлан тропарь:
«Царевококшайскын поро архипастырьже лийынат, священномученик Леонид, Христос черкын пеҥгыдемдышыже да Евангелийым шуктышо: орландарен поктылмашыш, тыгак кепшылыш да пычкемыш петырымашыш логалынат, апостол-влак семын шке илышетым тӧрленат, вӱр марте орланенат, Христос Юмо нерген чыным туныктенат, Тыйым шарныше-влак верч тудым кугун сӧрвале».
«Марла молитва-влак» книга гыч налме,2005 ий
Шарнаш кодшо ой:
Паша тошто шӱрышкат тамым пурта.
Паша деч посна уш пеҥгыдын ок шич.
Еҥ ойлымо дене шӱгар пундашке пурен от воч.
Окса кидым ок когарте.
Чодыраште йӱк латкок оҥгыран.
Сай лектышым йылме дене огыл, паша дене налыт.
Пиал шанчаш огыл, корнышто ок кийылт.
А.Е.Китиковын «Марий калыкмут мутер» книгаж гыч налме,1990 ий.
Ӱмырым илен эртарышын каҥашыже:
«Кыралтше еҥ кугурак сеҥымашке шуэш,
Пуд шинчалым кочшо мӱйым утларак акла,
Шинчавӱдым йоктарыше утларак веселан воштылеш,
Кӧ колен, илышым утларак акла.»
Омар Хаям.
С.Носова ямдылен
Снимкыште: Карась ер вӱдын пыл ораже-влак… (облака)
Авторын фотожо
