КАЛЕНДАРЬ

Кечышот ден калык пале:

12 февраль – Коҥга пазар (Кужэҥер район)
Марий кумалтышын чинче тушыжо:
«О Сурт Юмо, Сурт Пӱрышӧ! Шочмо, кушкыжмо, вӱргече, изарня, кугарня, шуматкече, рушарня суксо, шым кечын шым суксо… Ончылгоч палемдыме кечын, палемдыме верыш миен, эрденак тӱҥалын кас марте кумалын шогышна. Кумалтышнам йӧратенак нал, тӱрлӧ ойго деч аралтышым суксо деч йодына».
Сай койыш, сай йӱла дене илышашлан айдеме мом ыштышаш?
1. Мо тыйын йырет уло – чыла чаманаш да аралаш.
2. Мланде Авам ужалаш-налаш тӧчыман огыл, тидын нерген шонымашымат вуйышто кучыман огыл.
3. Кочкышым, вургемым, йолчиемым, вакшышым, айдемын илышыште кучылтмо тулеч моло арвер-ӱзгарым утыждене погыман огыл. Мо кӱлешыжат пешак шагал лийшаш, мо улыжым арален кучаш кӱлеш. Наста, окса, поянлык деч, ший-шӧртньӧ арвер деч кораҥман, эмлык ӱзгарым шагалрак кучыман. Тамакан, аракан, наркотикын кӱлешыжат уке манын шоныман, нуным шупшаш, йӱаш да кочкаш огеш кӱл.
4. 4. Кӱлеш арверым, тӱрлӧ инструментым, йоча модышым кажне еҥ шке ышташ тунемшаш.
ЭрВел С.Семонын (Новиковын) «Сандалык – Ош Кугу Юмо» книгаж гыч налме.
Черке йӱла почеш:
12 февраль – Василий Великий, Григорий Богослов ден Иоанн Златоуст святитель-влакын кечышт.
15 февраль – Господь Иисус Христосым Вашлийме (Сретенье) пайрем.
16 февраль – Апостол-влак дене тӧр улшо Николай Японскийын кечыже.
Марий кундемысе священномученик Адриан Троицкийын кечыже. Тыглай илышыште – Адриан Александрович Троицкий (13.06.1872 -15.02.1938). 2002 ийыште тудым православный святой-влак радамыш пуртеныт.
Тунеммаште нелылыкым чытыше йоча-влак верч молитва:
«Господь Иисус Христос, мемнан Юмына, чыла латкок апостолын шӱмышкышт чынжымак пурышо да тулан йылме семын волышо Эн Святой Шӱлышын поро вийже дене нунын йылмыштым почынат. Тыге нуно тӱрлӧ йылме дене мутланаш тӱҥалыныт! Господь Иисус Христос, мемнан Юмына, Тыйын Святой Шӱлышетым нине йоча ӱмбаке (лӱмышт) Шке колто да нунын шӱмыш Святой Возымашын шӱлышыжым пурто, кудым Тыйын Эн Яндар Кидет закон пуышо Моисейын оҥашкыже возен. Кызытат, керек-кунамат, курым-курым мучкак. Аминь!»
«Марла молитва-влак» книга гыч налме. 2005 ий.
Шарнаш кодшо ой
Моктышо еҥ пече меҥгымат ший меҥгыш савыра.
Мом палымет шуэш, тудым шке кидет дене ыштен ончыман.
Окса пойдара, окса йомдара.
Сатулан вуй – оза, пазарланже вуй – окса, оксаланже вуй – паша.
Ораде чыламат орадылан шотла.
Мардеж ваштареш ошкылаш куат шуко кӱлеш.
Палыме – ик паша, уэш ойлымо – вес паша.
Пашам йӧратышын кечыже йол мучаште лектеш.
А.Е.Китиковын «Калыкмут» книгаж гыч налме.
С.Носова ямдылен
Авторын фотожо

Опубликовать в Одноклассники

Добавить комментарий