Марий кечышот:
14 октябрь – у тылзе.
20-23 октябрь – Шӱдыр йогымо жап – йӱлам шукташ келшыдыме кече-влак.
Марий кумалтышын чинче тушыжо:
«Ош Поро Кугу Юмо…! Таче кечын кумалына, мамык комбетым кондышна. Вуй, шинча-пылыш, шӱм-мокш, пагар-верге чер дечынат, могыр удыртыш дечат, неле еҥ чер дечат, калык валне коштшо тӱрлӧ чер дечат арален шого (шогыза). Поро кинде перкем, вольык перкем, чодыра перкем, вӱд перкем йодына. Ӱлыл тӱтырам кӱш кӱзыктен, кӱшыл тӱтырам ӱлыкӧ волтен, мӱндыр тӱтырам лишке конден, кум тӱтыра коклаште улшо, кӱрылтыдымӧ шӱм погылан, ӱш погылан, айдеме погылан кужу илышым, кугу вийым пуэн шого (пӱрызӓ)».
«Кумалтыш мут» брошюр гыч налме. 2018 ий.
Черке йӱла почеш:
17 октябрь – Озаҥысе архиепископ святитель Гурийын мощыжым мумо кече. Азъял-Пӧтъял черкын пайремже.
18 октябрь – Москосо святитель-влакын кечышт.
19 октябрь – Апостол Фоман кечыже.
22 октябюрь – Апостол Иаков Алфеевын кечыже.
Эн Святой Юмынавалан муро:
«Юмым шочыктышо Ӱдыр, йывырте! Поро пӱрымашан Мария, Тый денет Юмо; чыла ӱдырамаш дечат утла Тый поро пӱрымашан улат. Тый дечет Шочшат поро пӱрымашан, вет мемнан чонам Утарышым Тый шочыктенат!»
«Марла молитва-влак» книга гыч налме.2005 ий.
Калык пале:
Пыл ора-влак кӱшнӧ лаштыкын-лаштыкын ийыт – игече саемеш.
Поҥго уке, пӱкш шуко – теле йӱштӧ да луман лиеш.
Октябрьыште кӱдырчӧ кӱдырта – теле луман лиеш.
Октябрьыште пӧрш налеш – игече сай да леве лиеш.
Икымше лум нылле кече деч вара йӧршешлан возеш маныт.
Пӧрш налме деч 90 кече вара лум сайынак возеш.
Шарнаш кодшо ой:
Окса таче уло, эрла – уке, ушым погет гын, эре лиеш.
Капка йымал пият оптен кодеш, да пурлаш ок тошт.
Калыкын мурышто – шӱм-чонжо, сынже.
Калык шӱлыш толкыным тарвата.
Кайыше имньым вуй гыч огыт пере.
Осал ӱдырамаш деч тулвондо лӱдеш, вӱдвара тарвана.
Ошкылмет годым урвалтет рӱзалт шогыжо, кочмет годым янакет модын шогыжо.
Паша айдемым ок локтыл.
А.Е.Китковын «Калыкмут» книгаж гыч налме.
Психолог темла:
Тый дечет полышым огыт йод гын, виеш полшаш огеш кӱл.
Жап дене тӧр каяш виеш тыршаш нимолан, мутлан, илыш деч кодаш огыл манын, у технологийым палаш, тӱняште мо лийме уверым эскераш, чыла палаш, эре ала-мо улан тунемаш. Лучо мо тыланет келша – тудым ышташ.
Икшыве-шамычын тауштымыштым вучаш огеш кӱл. Нуно шке илышыштым илат.
С.Носова ямдылен
Снимкыште: кӱсле сем марий кумалтышыш ойыртемалтше шӱлышым пурта.
Авторын фотожо
