ЙӰЛА

Ик кечын – кум пайрем

Кодшо шуматкечын, 16 июльышто, У Торъял поселкышто кум мероприятий лийын.

 Икымшыже – «Творцы и хранители» еш-тукым ансамбль-влакын  регион-влак кокласе V фестивальышт.

Тудым торжественно почмаш республикысе 12 район гыч еш-тукым фольклор ансамбль ден коллектив-влакын урем дене ошкыл кайымышт гыч тӱҥалын. А мероприятийыш Волжский, Звенигово, Морко, Оршанке, Советский, У Торъял, Кужэҥер, Параньга, Курыкмарий, Килемар, Марий Турек, Медведево районла да пошкудо Чуваш Республик гыч чылаже 35 еш коллектив ушнен.

Фестивальыш чумыргышо-влакым Марий Эл правительстве председательын икымше алмаштышыже Михаил Васютин, У Торъял муниципал район образований вуйлатыше Евгений Небогатиков, У Торъял муниципал район администраций вуйлатыше Василий Блинов саламленыт. Районын гимнже йоҥгалтме жапыште фестивальын тистыжым нӧлталыныт. Тыгай йӧн Чуваший гыч гран-прим сеҥен налше, I-ше степенян лаурат лӱм дене кок гана палемдалтше «Кӑмӑл» еш фольклор ансамбльлан да  фестивальын призержо – Тошто Торъял гыч Прозоровмыт еш коллективлан пуалтын.

Фестивальын ныл номинацийыштыже шке усталыкше ден мастарлыкшым   235 конкурсант ончыктен. «Эн сай еш фольклор ансамбль» лӱм дене «Кӑмӑл» палемдалтын. Кидпаша конкурсыштат тиде еш фольклор ансамбляк да Медведево район Кудрявцевмыт-Стрельниковмыт еш  I-ше степенян лауреат лӱмым сеҥен налыныт. «Детки и предки» фотовыставкымат эн сайын ямдылышылан жюри «Кӑмӑл» ансамбльымак шотлен. «Эн сай национальный кухньо» номинацийыштат икымше верыш тиде еш ансамбляк да Звенигово район гыч «Яким тукым» еш ансамбль лектыныт.

«Национальный кухньын йӱлажым аралымылан» посна диплом дене Килемар район гыч «Каразоран» еш коллектив ден Курыкмарий район гыч «Мыралтена-кушталтена» усталык коллектив палемдалтыныт.

Фестивальын гран-прижымат, мо оҥайже, «Кӑмӑл» еш фольклор ансамбляк сеҥен налын. Мероприятийлан нуно чот ямдылалт толыныт, коеш…   

Конкурс программе деч вара Тыныслык площадьыште  «Инструментальная мозаика» таҥасымаш лийын. Тушто икмыняр еҥ калык инструмент дене шоктен моштымо мастарлыкшым ончыктен. Нунын коклаште сеҥышыш Родион Алексеев (Оршанке район) ден Юрий Дмитриев (Волжский район) лектыныт.

Кокымшо мероприятийже регион-влак кокласе «Торъяльский FORDSON» ретро-технике  VI фестиваль лийын.

Тушко шкенан республик деч посна эше Башкортостан, Чуваший, Татарстан республикла, Киров, Самара областьла гыч ондакысе техникым погышо, аралыше да реставратор-шамыч шке техникыштым ончыкташ конденыт. Мутат уке, тиде фестивальлан тӱҥалтышым ыштыше, а кызыт уло Юл кундемыште эн кугулан шотлалтше тоштерын вуйлатышыже, У Торъял поселко гыч Андрей Куклинат шке коллекцийже дене палдарен. Тудак мероприятийым почмо годым фестивальын тистыжым нӧлталын.  

 Тушко чумыргышо-влакым Марий Эл правительстве председательын икымше алмаштышыже Михаил Васютин, У Торъял муниципал район образований вуйлатыше Евгений Небогатиков саламленыт.

Молгунамсе семынак техникым ончаш да южышкыжо шинчынак але воктекыже шогалын фотом ыштыше ятырын лийыныт. Вет фестивальыште 26 коллекционер 34 единице ретро-техникым ончыктен. Тӱрлӧ номинацийыште ойыртемалтше да участик-шамычлан дипломым, кубокым, шарнымашан пӧлекым Михаил Васютин ден Василий Блинов кучыктеныт.

Торжественный ужаш деч вара тӱрлӧ автотаҥасымаш, мутлан, автомобильым шупшмо «Бурлак с «Волгой», капотыш стакан вӱдым шынден, адыргылын савырнылын (змейка) кудалмаш, икмыняр моло конкурс эртаралтыныт.

 

Кумшо мероприятий – У Торъял поселкын кечыже. Тений тудлан 207 ий теммым палемденыт.

Погынышо-влакым уна ден верысе муниципал район, администраций вуйлатыше-влак саламленыт, южышт пӧлекым кучыктеныт. Пайремыште тыгак поселкын илышышкыже чолган ушнышо, тӱрлӧ йодышым рашемдаш полшышо еҥ-влакым, эн сайын тӱзатыме кумдык шотышто шуко пачеран пӧртым, шке илыме верым, организацийым да эн сай уста ешым палемденыт.

 Пайрем жапыште поселкын тӱрлӧ кундемыштыже мероприятий-влак эртеныт. Кумылан-шамыч патыр-влакын таҥасымашкышт, «Веселые старты» модмашке ушнен, армреслингыште, кирам нӧлтымаште вийыштым терген, футбол дене модын кертыныт. Кастене тӱвыра да каныме рӱдерыште комедийым ончыктеныт. Рӱдӧ площадьыште ретро муро эстраде концерт лийын. Тылеч вара погынышо-влакым верысе «Эхо» ВИА куандарен.  Тыге пайремыш мийыше-влакын нунын дене пырля мураш да кушташ йӧнышт лийын.

Кум пайрем лӱмеш пытартышлан поселко ӱмбалсе кавам сӧрал тулсавыш волгалтарен.

Л.Камалетдинова

Фотом соцкыл гыч налме

 

Опубликовать в Одноклассники

Добавить комментарий