Марий йӱла почеш:
7 апрель – Тер кудалтыме кече (тиде кечын у пашам тӱҥалаш огеш лий).
Марий кумалтышын чинче тушыжо:
«Ош Поро Кугу Юмо, пеш кугу тау сай-тыныс мален кынелмемлан. Ончыкыжат полшо мылам, ешемлан, родо-шамычемлан яндар уш-акыл дене, поро шонымаш дене, поро кумыл дене илаш».
«Ош Кугу Юмо, мыйым, ачам-авамым, коча-ковымым, пелашемым, йочана-влакым (лӱмышт дене каласыман) йоҥылыш деч утаре, шем шӱлыш деч сакле, осал вий деч арале».
ЭрВел Семонын (Новиковын) «Сандалык – Ош Кугу Юмо» книгаж гыч налме.
Черке йӱла почеш:
3 апрель – Преподобный Серафим Вырицкийын кечыже.
6 апрель – Тоштыеҥым уштымо шуматкече.
7 апрель – Юмын Авалан Поро пӱрымашан Уверым пуымо кече.
Преподобный Серафим Саровскийлан пелештыме ой:
«Поро пиалан, изиет годсек Христосым йӧратенат. Тудлан, иктылан, тул гай служитлаш шоненат, чарныде кумалмет да пашат дене еҥ уке верыште чот тыршенат, пушкыдо шӱмет дене Христосын йӧратымашыжым погенат. Юмын аважын ойырен йӧратымыже лийынат, сандене тыйым чотак йодына: мемнан преподобный Серафим ачана, шке кумалмет дене мемнам утаре».
Калык пале:
Апрельыште ночко – кеҥежым поҥго шуко лиеш.
Апрельыште кӱдырчан йӱр лиеш – кенеж шокшо да пӱкш шуко лийыт.
Апрельыште куэ вӱд шуко – ночко кеҥежым вучо.
Апрельыште вараксим толын огыл – шошо кужун шуйна да йӱштырак лиеш.
1 апрельыште могай игече, тугаяк 1 октябрьыште лиеш.
Эҥерыште ий вӱд толкын дене писын йоген кая – кинде сайын шочеш.
Корак-влак йӱштылыт – левешта.
Пӧрт леведыш гыч лум тӱрыс йоген волен огыл, пасуштат тудо эше тылзе наре кияш тӱҥалеш.
Шарнаш кодшо ой:
Шуко малыше пашалан ок шу.
Манеш-манешлан ӱшанет гын, вуешат упшым ит шынде, шовычымат ит пид.
Мардеж пуалде, лышташ ок тарване.
Лишыл таҥет мондет гын, мӱндыр родетат ойырла.
Мумо ӱзгарын ӱмыржӧ кӱчык.
Налаш куштылго, пуаш – неле.
Окмакышт огыт лий ыле гын, ушанышт огыт кой ыле.
Сай пашан шулдыржат кумда.
Чылажлан кече от лий.
А.Е.Китиковын «Калыкмут» книгаж гыч налме.
С.Носова ямдылен
Снимкыште: марий-влак самоварым ожнысек пӱгыльмӧ дене олтеныт.
Авторын фотожо
