Тенийысе шошо игече калыкым чот ӧрыктара: теве гына чевер кече шке шокшыж дене сад-пакчаште сомылым ышташ тарата, а вес кечынже йӱштӧ толын, мландым ош лум дене леведеш. Южыштын олмапуштымат эсогыл йӱштӧ налын маныт.
Йолташ-влак, те сад-пакчаштыда иктаж мом шынден шуктенда ыле мо? Могай кушкылдам йӱштӧ кылмыктен?
Светлана АБРАМОВА, Оршанке район Ильинка посёлкышто илыше:
– Утларакшым шукияш пеледышым ончен-куштена. Нуныжымат йӱштӧ «чывыштал» шуктен. Йӱштырак игечылан кӧра теплицыш кияр ден помидор росотам эше лукмо огыл, пакчаштат нимом ӱдымӧ огыл. Молан манаш гын, кажне ийын майыште тыгай йӱштӧ толеш, тидым ынде палена.
Эльвира ГУРЬЯНОВА, Волжский район Пӧтъял школын туныктышыжо:
– Шере пурысым теплицыштат йӱштӧ налын. Тидыже, мутат уке, пеш вучыдымо ыле. Кызыт игече юалгырак, садлан изиш левештымеке, пакчашке моло пакчасаскам шындаш да ӱдаш тӱҥалына.
Инесса СТЕПАНОВА, Йошкар-Олан тӱвыра паша виктарыше рӱдер вуйлатышын алмаштышыже:
– Тюльпанем-влак йӱштырак годым вуйыштым сакеныт ыле, а кече ончалмеке, нӧлталалтыч. Кылме пеледыш пӧртыштат сайынак почылто.
Кызыт игече йӱштырак гынат, пеледыш-влак: пион, примула, роза куанен нӧлталалтыт.
Шыжым шындыме шоптырвондо, эҥыжвондо лум дене ынышт кылме манын, «шокшемденам» ыле.
Шошым теплицыш лумым шуко кышкенна, ночкырак ыле, садлан але нимогай кушкылым тушко шынден огынал.
Олмапу, вишне кугужак огытыл, садлан йӱштӧ толмо деч ончыч мешакым «чиктышна».
Сад-пакчаште лияш моткоч куанле: умыр кастене шӱшпык йӱкшӧ торашке шергылтеш! Мардежан игечыште кайык-влакын сылне мурышт ышт йоҥгалт да йокрокынат чучын колтыш. Вашке игече шокшо лиеш да нунын йӱкышт уэш мемнам куандараш тӱҥалеш манын ӱшанена.
Екатерина ТЕТЕРИНА, «Ончыко» журналын ответственный секретарьже:
– Игече мыйым нимынярат огеш ӧрыктаре. Пӱртӱсын савыртышыжлан ме вийдыме улына: шкенжыным садак ышта. Садак кунам гынат шокшо, кунам гынат йӱштӧ лиеш. Пелашем манмыла, лучо майыште йӱштӧ лийже, уке гын июньышто кылмыкта. Ме эше пакча йыраҥыш нимом шынден огынал. Лачак шыжым чеснокым, севок шоганым шындымына веле кушкыт – нуно йӱштым чытат. А теплицыш мартыштак шуко мом ӱденна да кызыт рукколам, салатым, редисым, ужар шоганым, укропым, петрушкым, кинзам кочкына. Пел теплицыш помидорым шынден шуктенам, нунат кылмен огытыл, молан манаш гын йӱштӧ кечылаште йӱдлан обогревательым чӱктена. А олмапу, вишне, сливе пеледыш кылменыт гын, нимат огыл – тений нунын деч посна тугеже илена. Юмо кузе, кунам да мом пуа, тудланжат пеш тау!
Любовь ФЁДОРОВА, Морко район Унчо селаште «Порсын кумыл» тӱрлымӧ студийым вуйлатыше:
– Пакчам кӱнченна, но кызытеш нимат шындыме огыл. Тыгай йӱштыштӧ пеледышат кылмен-кылмен пеледаш толаша, шке моторлыкшо дене мемнам куандара. Теве вашке игече моторештеш да пакчаште пашам ворандараш тӱҥалына.
А.БАЙКОВА
Авторын фотожо
