Йӧратен ушненыт, йӧратенак суртым нӧлтеныт
Таче ме тыланда Провой кундемысе Эсмекплак селасе ик сылне пӧрт нерген каласкалена. Тудын озашт – Руслан ден Алевтина Яковлевмыт.
– Тыште ожно садпакча лийын, тошто суртнаже – пеленже. Тудыжо – ковамын шочмо пӧртшӧ. Ончыкылык пелашем дене ик школышто да ик классыште тунемынна, йӧратен ушненна да йӧратенак ныл икшывым ончен куштенна, кызыт нуно ешышт дене илат, – каласыш Алевтина Васильевна.
– Пелашем изинек кочаж воктене кушкын. Аким Павлович Яковлев уста кидмастар, чулым айдеме лийын, тудын кид-йолжо чылалан толын: юмылукымат, тумбычкымат, шифоньерымат, пӱкенымат ыштен моштен.
Кидмастарын пашажым ончен, рвезе столяр пашан секретшым пален налын да ынде тудын пашажым умбакыже шуя.
Алевтина Васильевна ден Руслан Михайлович 1986 ий августышто ушненыт. Ятыр ий еш дене Волжск олаште иленыт, но вара, аван черланымекыже, Эсмекпляк селаш кусненыт.
– Тиде пӧртым пу брус гыч ыштыме, – шарналта эртыше жапым Алевтина Васильевна. – Пошкудо-влакын полшымышт дене тудым кум тылзыште нӧлтен шынденна.
Суртоза ондак Озаҥыште пашам ыштен гын, кызыт – Москошто. Тудо чоҥымо пашаш вахте йӧн дене кудалыштеш. Плотник, столяр пашажым Станислав эргышт шуя.
Мутланымына годымак ме сылне пӧртым ончен лекна. Туврашым тошто семын ыштыме. Суртым простан да моторын сылнештараш калык ончыч моштен. Пӧртӧнчылыш пурымаште – шнуй Николай Чудотворецын сӱретше. Тудын йырже рамым ыштыман, сандене озан кидшым вуча. «Пӧръеҥлан канашат жапше уке», – шоналтышым.
Кудывече ден пакчам изи мотор кӱвар уша, а воктеныже – у монча. Тудын омсажымат моторын ыштыме.
– Телым тунар паша уке, Руслан Михайлович шканже сомылым муэш, –пелашыж умбакыже дене палдара Алевтина Васильевна.
Пӧръеҥ чынжымак яра шинчаш ок ярсе: пушеҥге гыч мом гына пӱчкеден луктедылын огыл! Гардиным сакаш арвер, тӧрза, юмылук, шагатлан авыртыш, пеледыш ате-влакланораван ате, пӱкен… Тумо пушеҥге гыч ыштыме пӱкенже мылам поснак келшыш, кучен ончыде шым чыте. Урем велысе окнам, капкам, фронтоным пуйто тӱрлен шындыме – туге сылнын пӱчкедыме.
Кызытеш суртыш пӱртӱс газ огеш тол, но озаватын ойлымыж почеш, тений тудым пуртышаш улыт. Кызыт суртым электрокоҥга дене ырыктат. «Ялыште илаш лиеш мо?» йодышемлан Алевтина Васильевна тыге вашештыш:
– Ялыште илаш шонет гын, лиеш. Паша вер веле лийже. Мый сулен налме канышыште улам гынат, Звениговысо эмлымверыште санитаркылан ыштем. Уныка-влакымат ончыман, а нуныжо мемнан шымытын улыт.
М.Скобелев
Авторын фотожо
.
