Провой кундемыште пеҥгыде коммунал шӱкшакым оптымо полигоным уэмдат.
Звенигово район администраций Чакмарий села деч йӱдвел-эрвелышкыла кок километр коклаште верланыше пеҥгыде коммунал шӱкшакым оптымо полигоным уэмден олмыктымо нерген конкурсым увертарен. Тидын нерген концессионный соглашенийым инфраструктур проект-влаклан полшымо платформыш вераҥден. Тудын дене келшышын, конкурсышто сеҥышыш лекше подрядчик объектым уэмда, шотышто куча да тудын дене пайдалана.
Полигоным 2008 ийыште чоҥымо. Проект почеш тушко 2 171 910 куб.м (434 382 тонн) тор пура. Ий еда полигоныш 32 000 куб.м (6400 тонн) марте III-V лӱдыкшӧ классан шӱкым оптат.
Соглашенийын вийыште улмо жапше – 10 ий. Инвестор проектыш 4,1 млн. теҥгем пыштышаш. Йодмашым 20 июль марте налыт, иктешлымашым 27 июльышто ышташ палемдат.
М.ИВАНОВА
