УВЕР ЙОГЫН

Кажне ветеран дене вашлияш кӱштен

Российын президентше Владимир Путин Кугу Отечественный сарын ветеранже-влаклан выплатым пеҥгыдемден.

«Сеҥымаш» оргкомитетын заседанийыштыже Владимир Путин Кугу Отечественный сарын ветеранже-шамычлан 80 тӱжем теҥге кугытан выплатым ик гана пуымо нерген указым лукмыж нерген увертарен.

Документ дене келшышын, 55 тӱжем теҥге кугытан выплатым налыт:

— Кугу Отечественный сар кайыме жапыште тылыште пашам ыштыше-влак;

— юж оборонын объектлаштыже тыршыше да аралыше сооруженийлам чоҥышо граждан-шамыч;

— блокадный Ленинградыште илыше-влак.

Владимир Путин тыгак чыла ветеранлан шке олаште, муниципалитетыште але регионышто илыше почётан еҥ лӱмым пуаш темлыме ой дене келшен.

«Кугу Отечественный сарын ветеранже-влак Сеҥымаш кечын тӱҥ участникше улыт. Нунылан да нунын йодмашыштлан эн кугу тӱткышым ойыраш кӱлеш», – палемден президент.

Элым вуйлатыше чиновник-шамычлан лишыл жапыште чыла ветеран дене вашлияш да нуным тургыжландарыше йодыш-влакым рашемдаш кӱштен.

Тений Россий Кугу Отечественный сарыште сеҥымылан 80 ий теммым палемдаш тӱҥалеш

Маргарита ИВАНОВА.

Опубликовать в Одноклассники

Добавить комментарий