Кодшо шуматкечын Йошкар-Олаште суртдымо-печыдыме-влаклан кочкышым пуэдыме эше ик точко почылтын.
Ынде Самырык-влакын «Мяак» толкынышт нужна еҥ-шамычым кажне кечын шокшо кочкыш дене сийлат. Тидын нерген тудын еҥже-влак соцкыл лаштыкышт гоч увертареныт. У точкыжо 4-ше №-ан поликлинике воктене шочмо, кушкыжмо, вӱргече, изарня, кугарня да шуматкечын ышта, 18 шагатат 30 минутлан кочкышым пуэдаш тӱҥалыт…
8 сентябрьыште ты организацийлан ныл ий темын. Тиде жапыште тӱҥ организаторжо-влак – ийготан пӧръеҥ-влак деке – 14-18 ияш рвезе доброволец-шамычат ятырын ушненыт. Нунын дене пашам ворандарашышт куштылгырак лийын, палемдат шкешт.
Таче организацийын шкенжын логотипше, пӧлемже, уставше уло. Тыглай кечын обшественный питаний сферыште ыштыше 6 организацият пуэдышашлык кочкышым ямдылаш полша, пӧрьеҥ-влак точко еда шке машинашт дене шупшыктат, рвезе-влаклан пуэдат.
Толкынын еҥже-влакын йодмышт почеш, шокшо кочкышым ямдылаш кӱлшӧ сату дене полшен кертше-влак нунын деке лектын кертыт: тушёнко, сакырложаш, чай, шӱраш, моло йӧрвар эре кӱлыт. «Маяк» толкын Первомайский уремын 140-шо пӧрттыштыжӧ верланен, телефон номерже – 8-969-7788-339.
Тачысе кечылан шокшо кочкышым тыгак рушарня еда Сомбатхей микрайонысо «Ананас» ден кӱртньыгорно вокзал воктене 15 шагатлан пуэдат.
С.Носова
Снимкылаште: шокшо кочкышым пуэдыме годым.
Фотом «Маяк» толкынын соцкыл лаштыкше гыч налме.
