У ий вашеш шке гыч изи кожым руымылан штрафым тӱлаш пуэн кертыт.
Тидын нерген Марий Элын Пӱртӱс поянлык, экологий да йырым-йырысе средам аралыме шотышто министерствыже шижтара. Тудын пашаеҥже-влак кызыт чодыраште рейдым да тыгак верысе калыкыште умылтарымаш пашам эртарат.
Граждан-влак шке кӱлешлан, тыгак вольыклан пукшаш кож, нулго, пӱнчӧ укшым 8 миллиметр кӱжгытан тӱҥан пушеҥге гыч веле налын кертыт:
– Ойырен налын але тӱрыс руымо лесосеклаште йӧрыктымӧ пушеҥге гыч;
– Эрыкташ палемдыме участкылаште (квартальный просекыште, пожар деч руаш манын руаш ямдылыме кумдыкышто, чодырам ямдылаш келыштарыме корнышто, шудым солаш, электропередаче линий, вӱд йымаке кайыше, кушто у пушеҥгым кушташ кӱлешлык вер уке).
Республикын чодыра фондышкыжо логалше кумдыкышто кожым руаш огеш лий.
Закондымын руымо кож але моло иман пушеҥгылан административно да тыгак уголовнат мутым кучаш шогалтен кертыт.
Светлана Носова
Снимкыште: рейд годым
Фотом министерствын воткыл лаштыкше гыч налме.
