«Образований» национальный проектын «Цифран тунемме кумдык» федерал проектше почеш 14 сентябрьыште республикыштына йоча-влаклан цифран образованийым пуышо кумшо «IT-куб» рӱдер пашам ышташ тӱҥалын. Тудыжо Политехнический лицей-интернатыште почылтын.
Рӱдерын программыже ончыкылык илышым кызытсе технологий да цифран экономике дене кылдаш шонышо ӱдыр-врезе-влаклан пайдале. Тидын деч посна тушто самырык тукымлан веле огыл, кугурак ийготан-шамычланат палемдыме направлений дене ешартыш шинчымашым налаш лиеш.
Марий Эл образований да науко министр Лариса Ревуцкаян палемдымыж почеш, «IT-куб» йоча-влаклан сай качестван образованийым пуышаш. «Рӱдерын тӱҥ шонымашыже – кажне йочан моштымашыжым вияҥдаш йӧным ыштымаш», – каласен тудо.
