«Это унас семейное» — тыге маналтеш элыштына увертарыме еш конкурс. Тудын кокымшо сезонжо стартым налын.
Конкурс еш тукым-влакым ушаш, коклаште кылым пеҥгыдемдаш да пырля эртарыме жапым веселаракым ышташ полшаш виктаралтын. Пырля поро паша-влакым шукташ, спорт дене шуаралташ, еш историйым шымлаш лиеш… Конкурсын условийже почеш уло еш дене заданий-влакым шуктыман, тыге балл-влакым погыман. А тидлан нылыт деч утларак еҥан командым чумырыман, но тушто кумыт деч утларак тукым гыч представитель лийшаш. Эн изиже регистраций мучашлалтмылан 5 гыч 17 ияш лийын кертеш. Конкурсыш регистрацийже 14 сентябрьыште мучашлалтеш.
Вара этосемейное.рф сайтыште еш акаунтым ыштыман. Тушто командын кажне членжылан анкетым серыман.
Конкурсын кокымшо сезоныштыжо сеҥыше-влаклан илыме условийым саемдаш 5000000 теҥгеаш сертификатым кучыктат. Финалыш лекше-влак уло еш дене путешествийыш каят. Утларак чолга участник-влаклан конкурсын партнёржо-влак приз ден пӧлек-влакым ямдыленыт.
Конкурс икмыняр йыжыҥ гыч шога. Ончыч еш командым регистрироватлыман гын, дистанционный йыжыҥыште онлайн-форматыште тӱрлӧ тематический направлений дене заданийым шукташ логалеш. Тыге эн сай еш команде-влак полуфиналыш лектыт. А тушто образовательный прграмман да темлыме задачан еш пайремым эртарыман. Финалыште эше икмыняр заданий лиеш. Проектын графикшым сайтыште рашемдаш лиеш. Тидын нерген Марий Элын Паша да социальный аралалтмаш министерствыже увертара.
Светлана Носова
